En repuesta a la defensa muy sorprendente de Raymond Barre, konsernando el kavzo “Maurice Papon” ko-responsavle de la deportasyon de miles de judyos, syento el dever de sitar el kavzo del grande Ambasador Turko Behiç Erkin, ke a la mizma epoka, en Fransya durante el periodo nazi, no se kontento solo de egzekutir el orden del Governo Turko de salvar todos los djudyos en posesyon de una karta de identidad Turka, ma tuvo por de mas el koraje de trespasarlo en azyendo tambyen profitar de esta desizyon nombrozos Judyos de Fransya ke tenian en sus asendensya una avuela o un avuelo Turkano, a los kualos el delivro mezo los konsolatos ,un sertifikato atestando sus apartenensya a la Nasyonalidad Turka, a la sola kondisyon de ambezarsen dos o tres frazes de muestra lingua.
Despues de 9 anyos de profundas invistigasyones a este sujeto, i sovre baza de dokumentos otentikos, su inyeto ,el eskritor Emir Kıvırcık vyene de publikar un livro entitulado “Büyükelçi” relatando esta maraviyoza epopea durante una epoka tan trajika..
Lunes de la semana pasada el 26 Febrero el livro fue komentado en “Kanal Türk”, i vyernes el 2 Marso en “Haber Türk”. En desparte del jornalisto, estavan prezentes: el autor de la ovra Emir Kıvırcık, i el ultimo sovrebivyente en Turkia de este epizodyo, muestro korelijyonaryo Lazar Robert Rousso ke konto en sus mas chikos detalyos las sirkunstansyas de su arrestasyon, su transfero i su estadia en el kampo de “Compiegne “ansi ke su salvasyon grasyas a la intervensyon del las Otoridades Turkas.
