İf Uluslararası Bağımsız Film Festivali`nin en çok alkışlanan filminin yaratıcısı İsrailli yönetmen Eytan Fox izleyicisiyle samimi bir söyleşi yaptı. Ortadoğu`daki uzlaşılmaz sorunu, bir eşcinsel aşk aracılığıyla anlatan yönetmen, barış ve uzlaşma mesajları verdiViktor APALAÇİ
Asta ande el antisemitizmo? asta kuando la fuersa de rezistensya de la sensivilidad djudia?
Klara PERAHYA
Desde unos kuantos anyos, despues el kurto periodo de silensyo ke sigyo la desgrasya de la Shoa, muevas baforadas de anti-Judaizmo estan soplando kaji en kada lugar del mundo.
(segun la Prensa Franseza)
La semana pasada: De muevo “ deklarasyones empapadas de odyo i amenazas de destruir Israel” de la parte de Ahmadinejad, prezidente de uno de los mas grandes estados del kontinente Azyatiko.
De otra parte: El Eurodeputado “Maciej Giertych” de orijen Poloneza , aunke myembro de una Institusyon fundada sovre el prinsipyo de umanizmo i anti-rasizmo, vyene de publikar un livro antisemito intitulado “Civilisations en guerre en Europe”(Sivilizasyones en gerra en la Evropa) kon, sovre la kovyerta, “el logo del Palamento Evropeo”.
Segun la gazeta “Nice-Matin del 28 Febrero 2007: En el Sud de la Fransya , en uno de los lugares los mas internasyonales del payis, syertos kompleksos immobilyaryos konservan ainda (aplikados o non aplikados ,en todo kavzo non abaldados) reglamentos ke datan de la epoka del “Governo de Vichy” formulando diskriminasyones enverso los djudyos.
En Paris, polemika entre el CRİF (Konsilyo reprezentativo de las Institusyones Judiyas de Fransya) i Raymond Barre (ex Premyo Ministro del mizmo payis entre los anyos 1978 i 1981) ombre de grande kultura, konsiderado komo persona muy sezuda i lojika, ma ke malorozamento (durante una entrevista kon el Posto radyofoniko “France Culture” Jueves el 1/3/2007, topo djusto de defender Maurice Papon kondenado en 1998 por “komplisidad kriminal kontra la Umanidad” por su rolo en la deportasyon de numerozos Judyos de Fransya durante el periodo nazi, alora ke el era Sekretaryo Jeneral de la Prefektura de Gironde.
A la kestyon del jornalisto ke le demando si Maurice Papon no devia (en las sirkunstansyas de akeya epoka) demisyonar de su posto , Raymond Barre respondyo” No se demisyona kuando se tyene grandes responsabilidades en un departamento ,salvo si se trata verdaderamente de un “Interes Nasyonal mayor”.
De todos los kavzos ke fueron sitados mas arriva, esta repuesta del ex primer Ministro Fransez, me parese ser el mas grave... Asta ande pudo infiltrarse la enemistad i la indiferensya enverso el drama Judyo?
