“It`s early to declare Ladino dead” (Haaretz)

Klara PERAHYA

Djuevez pasado resivi de la parte de Dora Niyego la kopya de un artikolo publikado en el kotidyano Haaretz, debasho la sinyatura de Yoav Stern..
Mi alegria fue grande kuando meldi el titolo “İt’s early to declare Ladino dead” i mas grande ainda kuando entendi ke el fue eskrito a la sigida de una entrevista kel jornalisto tuvo kon Tilda Levi responsavle de publikasyon del semanal ŞALOM i Karen Gerson Şarhon Direktora del Sentro para la mantenensya i la ekspansyon del Judeo Espanyol.
“It’s early to declare Ladino dead” En efekto, es no solo muy temprano ma absurdo de deklararlo muerto. Ay mas de 100 anyos ke oyemos el mizmo refrano, desde la fin del 19en siglo munchos intelektuales entre los kualos syertos de muestra komunidad i otros de la komunidad de Salonika de antes la segunda gerra mundyal, lo avian predicho i mizmo (lo ke es muy triste) prekonizado.
Tambyen, ay de esto mas de un anyo me akodro aver meldado en el kotidyano Haaretz el mizmo, un artikolo bastante negativo al kual aviamos respondido en esta mizma pajina.
Malgrado las previzyones negativas i el pesimizmo de munchos, en este momento chikas armadas de voluntaryos luchan en munchos payizes del mundo para ke este idioma no muera... No se tyene el derecho de deshar murir, por indiferensya, una entidad ke ainda kere bivir i ke, oy en dia, mos permete de komunikar kon personas monolengues ke avlan solo el Espanyol, komo es el kavzo en munchos lugares de los Estados Unidos del Sud i en la Amerika Latina.
Es ke estos chikas grupos van a reushir? Ninguno puedra predezir lo ke sera el rezultado, ma el solo fakto de luchar es a el solo un akto de vida.
En una de sus “Letra a los lektores”, Moshe Shaul (fundador i shefe redaktor de la revista “AKİ YERUSHALAYİM”) avia kon muncha pertinensya refuzado enerjikamente el vokablo “agonia” para definir el largo periodo durante el kual sus propyos lokutores se detenian de utilizar esta lingua.
Si, despues la segunda gerra mundyal, uvo un momento de silensyo por no dezir de indiferensya, ma unos kuantos ombres i mujeres no abdikaron i ansi el instinkto de vida re-topo sus derechos.
“La pajina semanal en Judeo Espanyol del Şalom dirijida por Tilda Levi ke durante su chikes,en su kaza, no oyo nunka avlar muestra lingua etnika i ke oy la avla i la eskrive byen”, “ la kreasyon del Mensual “El Amaneser” grasyas al dinamizmo i enerjia de Karen Sarhon i el ayudo tan efisyente de Güler Orgun”, “la asiduidad de todos los eskritores de diferentes edades, de Turkia komo del estranjero”, son provas irrefutavles de este arrebivimyento.
En esta mizma oja, uvo un Salamon Bicerano luchador invensible en su soledad... Ay syempre Rav Adoni,ke no mos manke.  Ay una Coya, una Dora, una Şeli, una Ninet, una Sara, una Nelly, una Ester, una Beki, una Anet, un Eli... De las Amerikas, ay una Rachel Bortnick i un Aslan Apalachi tambyen syertos otros ke mos mandan de vez en kuando artikolos muy interesantes, ay todos los ke kon sus asiduidad i sus regolaridad mantyenen la flama sakra del esforso.
En “El Amaneser”, mensual de 16 a 20 pajinas se topa una armada ainda mas grande de eskritores ke no me atrivo a enumerar de espanto de mankar sin kerer uno de entre eyos...
Tenemos en permanensya una “Tilda Levi” lakuala kon su komprensyon i su maraviyozo kudyo, supo krear una atmosfera de kerensya resiproka en el Şalom, propisya a atizar la ardor.
Tenemos una Karen Şarhon kon su vitalidad personal i sovre todo kon su kapachidad de konkretar lo ke parese ser irrealizavle...
Ay el “staf” entero del Şalom, karas syempre sonrientes, prontas a ayudar.
Ay enfin la masa kada vez mas kompakta de los lektores ke se enteresan a los diversos artikolos en Judeo-Espanyol , mos eskriven o mos arrestan en la kaya ara formular ken una kestyon, ken una remarka o una kritika munchas vezes justifikada, ken tambyen una apresyasyon... kada una de estas intervensyones mos es presyoza, kada una es la prova de un interes por este ermozo patrimonyo ke mos vyene de muestros antepasados.