El filmo ‘The Passion of Joshua The Jew`:Una repuesta al filmo ‘The Passion Of Jesus&

Dora NİYEGOLa semana pasada, en Estambol, se djugo el filmo ‘The Passion of Joshua the Jew` direktado por Pasquale Scimeca, kon el titro de ‘Cile`en Turko.

Judeo-Espanyol
9 Ocak 2008 Çarşamba
El filmo mos esta kontando la estorya de Joshua, un djudio nasido en Espanya, ke, komo munchos otros Sefarades fue obligado a deshar su patria en 1492, kuando se publiko el edikto de la Ekspulsion por la Reyna Kastilyana, Isabel.
Un amigo de Isabel, Don Isaac Abravanel, predikto ke Joshua va ser el muevo Mashiah. En el filmo, estomos viendo la esperansa del puevlo djudio por un Mashiah, ke venga i ke los salve, komo fue en todos las epokas difisiles de muestra estorya.
Don Isaac Abravanel se desida de embiyar Joshua, su madre i su ermana a Napoli. Duspues de un viyaje perigolozo, los tres arivan a Napoli. Ma mezmo en Napoli, el antisemitizmo no los desha repazados i se fuyen a Sidjilya. En Sidjilya, mirando ke vana ser ekspulzados de muevo, esta vez, se desidan de komportarsen komo ke son Kristianos. En sus muevo lugar, Joshua se empasa a sinter komo Mashiah i empesa a dar pasensya al puevlo prove. Los papazes se sienten dezrepozados de los aktos de Joshuah i lo krusifikan de verdad, en una pyesa ande estava djugando el rolo de Jesus. Esta vez, un djudyo esta krusifikado por los Kristyanos komo ke fuera una repuesta al filmo ‘The Passion of Jesus’ de Mel Gibson.
La estorya de Joshua es una eksklamasyon kontra la intolerensia i el antisemitizmo i en mezmo tiempo, es un sinyo de esperansa por las personas ke tienen kreensia al Dio.
Pasquale Sciemeca, el direktor de este filmo, en su manseves, dekuvrio ke sus antesesores eran Marranos (djudios forsados a konvertirsen al Kristianizmo durante la Engizisyon). Sciemeca esta dizyendo ke, esta dekuvrida lo oriento a entender los orijines obscures de sus espantos de Jesus de su chikes. Mas duspues, Sciemeca se desido de investigar la istorya, la kultura i las tradisyones relijiozas de los djudios, los komparo kon el Kristianizmo i el Islam.
Segun Sciemeca, los Kristianos son la kavza de la antipatiya kontra los Djudios en el mundo entero. Esta ena es el orijen del Nazismo i del komporto kontra los Djudios mezmo oy en diya. Sciemeca esta amostrando el paralelizmo de la Engizisyon kon el malkomporto de los Kristianos kontra las otras relijiones.
El mesaje del filmo es muy klaro: ‘Los Djudios i los Muslimes son ermanos en el egzilo komo kinyentos anyos antes. Estos egzilos indjustos fueron el obstaklo a la pas i al repozo en el mundo. Los Kristianos, oy en diya, estan dezeyando a konvertir al mundo entero al Kristianizmo. Ma kale lavorar todos endjustos a trayer djustisya, pas, i tolerensia por ke, las jenerasyones futures no sufran mas’.