Novelas... Novelas...

Elie Wiesel agresado en los Estados Unidos
La semana pasada a la sigida de una konferensya sovre la Paz, Elie Wiesel  fue agresado en los Estados Unidos por un negasyonisto ke lo kijo forsar a nyegar la terrivle realidad del jenosidyo Judyo durante la segunda gerra mundyal.
Salvo el espanto, el grande eskritor i testigo de la Shoah no tuvo orozamente ningun danyo fiziko.
Una kestyon vyene al tino- “Es ke el anti-Judaizmo tomo una aparensya mueva?”. Aunke ainda muy raros, los ke nyegan la atros trajedia paresen pujar de dia en dia , komo si, en un ultimo esforso, eyos keren azer despareser las trasas de las terrivles sufriensas ke fueron inflijidas al puevlo Djudyo, en el solo eskopo ke eyas no pasen a la Istorya.

Una djunta muy interesante
Martes el 6/2, İnvitado (grasyas a la intervensyon de  muestra amiga Jale İbrahimzade i del Profesor Dr. Moise Behar) a dar una konferensya en el Barinyurt, el  shefe  del departamento de Neuro- Jeriatria del  Ospital Cerrahpaşa  el prof.Dr. Engin Eker  tuvo la grande amabilidad de venir avlar  sovre “las depresyones nyervozas a una edad avansada”.
El profesor Engin Eker mos  aklaro de una manera muy eksplisita sovre numerozos puntos oskuros  para mozotros  i respondyo a multiples kestyones. Muestro kolega David Ojalvo el mizmo estudyante en medikeria  vos dara en el proksimo numero del Şalom un raporto muncho mas ancho.    
Martes el 6/2, la asistensya en su grande mayoridad era kompuesta de damas myembros de  ovras  dedikadas a avrigar i abediguar personas aedadas en el dezmamparo..Todas estavan aya, atentivas,dezeozas de intensifikar sus medyos i posibilidades de ayudo.
Esta maraviyoza unyon en un mizmo esforso de solidaridad es uno de los elementos los mas fuertes ke aseguraran syempre el adelantamyento de muetra Komunidad..