Temas Sefaradis en el Kongreso de Estudios Djudios en San Diego

El limito de muestro espasio aki no mos permete transmeter todos los sujetos ke se diskutieron.  Solo podemos tokar en algunos temas de entereso sefaradi ke se trato alientro de la ancha disiplina de Estudios Djudaikos. Por egzemplo, en un panel yamado “Is Ladino Dead?”  (Ladino ya Murio?)  las konferensias fueron sovre: la poezia de Clarisse Nicoïdski i Margalit Matitiahu  (Monique Balbuena) ; la introduksion de la vida “Frankeada”  a los Sefaradim, mezo un romanso del presipio del siglo XX (Manuela Cimeli); la literatura de Matilda Cohen Sarano (Gloria Ascher); i el estado de Ladino en dia de oy (Rachel Amdo Bortnick.)
En un panel de  “Ideologies and Boundaries of Modern Sephardi and Arab Jewish Communities”, se trato de: las reaksiones de los Sefaradis Otomanos a la gerra Russa-Turka de 1877 (Julia Cohen); la pratika de medisina en Salonik al prensipio del siglo XX (Paula Daccaret); el sionizmo de la mansevez sefaradi de Arjentina, (Adriana Brodsky);  la identita Judeo-Arabe en la prensa Mashriqi1920񮕬 (Lital Levy) .  Otras konferensias de temas sefaradis durante el kolokyo inkluyeron: literatura sefaradi “frankophone” moderna (Johann Sadock); aspektos de famiya i identita en la literatura sefaradi de Israel (Dvir Abramovitch); istoria sefaradi en la istoriagrafia espanyola del siglo XIX (Michael Friedman); las primeras kolonias Judiyas en Palestina Otomana de punto de vista de las mujeres (Margalit Shilo);  la influensia sefaradi en el romansero moderno de la Amerika Latina (Vanessa Paloma); ansi ke varias konferensias sovre “Anusim” (los djudios ke fueron forsados a konvertirsen al Katolisizmo),  Judios de Italia,  Judios de Algeria, Rambam (Maimonides), i mas.
Aparte de las konferensias, uvo tanbien un konserto de kantes sefaradis del ekselente grupo “Flor de Serena”, kon la muy sempatika i alavada kantadera i muzikanta Vanessa Paloma i su ekipo de muy kumplidos akompanistos: Jordan Charnofsky – gitara, i David Martinelli - perkusion.  Vanessa mos kanto no solo kantikas i romansas konosidas, ma tanbien otras jeneralmente deskonosidas i mezmo una ke no se tiene enrejistrada deltodo, “Los Japones”, eskrita i kompozada de Jack Mayesh (z.l.) de Los Angeles, ke trata del desparesimiento de los Japonezos-Amerikanos de Los Angeles durante la sigunda gerra mundial (kuando el governo los mando en kampos de konsentrasion.)  Esta kantika no solo ke estava esmoviente, ma kreygo ke sera la unika kantika sovre este sujeto en kualker lingua.  Otra koza enteresante fue el instrumento yamado “virginal” (paresido al “harpsicord”) ke tanyo Vanessa en kantando “Bendigamos al Altisimo”, kantigas kon raises del siglo XVII en Evropa, ande se uzava este instrumento.
Malorozamente los ke asistieron a este konserto maraviozo fueron no mas de 80 personas; kijo dizir relativamente muy pokos de los ke asistieron al kongreso, ke eran siguramente en grande mayoria Ashkenazim.
Durante los tres dias del kongreso uvo tanbien vendida de livros, i una ekspozision de “posters” echos en klasas  de  universidades.   Entre estos avia unos kuantos de temas Sefaradis:  Los Sefaradim de Olanda en el sigolo XVII; Identidad Judeo-Siriana en la Sivdad de Meksiko; La Inkizision Mediaval en Sisilya; i – el ke me atiro la atansion devista – uno ke  tratava de los Judios de Estambol, preparado por Marcy Brink-Danan, antropolojista en Brown University, Providence, Rhode Island. 
En un kongreso tan grande es imposible de asistir a todas las konferensias ke le enteresa a una persona, porke tantas son dadas simultaneamente.  En este kavzo, avia 30ᇆ konferensias alientro  de 12 a 14 panels  (en diferentes salones del otel) en kada dos oras.   Ma aun kon todo, es bueno ver ke diversos aspektos de la vida, kultura, i istoria Sefaradi se estan estudiando i investigando  adientro de la disiplina de Estudios Judaikos en los Estados Unidos.