Dora NİYEGOEl selebre historiano Stanford Shaw muryo en el diisesh de este mez. En el diziocho de Desembre, diya de Lunes, Shaw fue enterrado en el Simeteryo Ashkenaz, en Ulus, duspues de la seremonia de los funerayes ke fue akomplida en la Sinagoga de Ortaköy en Estambol. El Grande Rabino Ishak Haleva, El Prezidente de la Komunitad Djudia, Silvyo Ovadya, sus asistentes i el Historyano Ilber Ortaylı asistieron a la seremonia.
Rav Yeuda ADONİ
La peraşa de la semana esta kontinuando a kontar los evenementos de Yosef ijo de Yaakov nuestro padre. Por razones de selo famial el fue vendido por esklavo. Yosef el primer cudyo ke enpeso a bivir en el etranjero. El fue model a todas las jenerasyones a la manseves Cudia. El parvino a suvir del pozo de prezo en Ejipto a devenir sigundo del Rey.
Laboriozo, honesto, kapaçi temyente de D. i onbre de, alta moral. El refuza kategorikamente las propozisyones de la mujer de su amo, mezmo ke le kavzo a Yosef grandes sufriensas. El supo gritar a boz alta sin verguensa i darse a konoser i dizir "İvri Anohi" yo so Cudyo. Yo so Cudyo i del D. de los syelos tengo miedo.
Esta peraşa se melda munças vezez en la semana de Hanuka.
Azyendo aluzyon a la vida de Yosef, kon los evenementos de esta fyesta, en la perioda ke los Elenos okuparon Erets-Yisrael i kijeron exterminar la kultura Monoteista ke ez la kreensa en un D.
Eyos defendyeron las tradisyone Cudaikas. El puevlo cudyo komo syenpre luço, a no asimilarse kon la kultura Elena i kontinuo en el kamino de sus avuelos. Eyos suivaron el kamino de Yosef eskojeron las diffikultades ma garantizaron la egzistensya del Cudaismo grasyas a esta manseves kontinuo la azete de la menora a dar su luz eyos en syenderon kon la poka azete la Menora i el D. les ayudo a ke kontinue la luz de la menora. Hanuka ez el sembol de no espantar de ninguna fuersa ajena ke kere a matar la luz de la relijyon todo el tyenpo ke nozotros la defendemos mezmo kon nuestras çikas fuersas el D. nos ayuda a guadrarmoz.
Nozotros azeremos nuestro dover el D. ya nos kita a lus komo un çiko Yosef parvino en su kamino i no se peryo en el koryente ajeno ansi nozotros kontinuaremo en el kamino de nuestra Relijyon i el todo potente mos kita syenpre a luz en los diyas los mas eskuros la luz de la hanukiya nos aklara nuestros pensanuyentos i nos de la enerjiya nesesitoza en nuestro kamino.
Hag Hanuka Sameah.
