Un filmo Israeliano: ‘USHPIZIN`

Dora NİYEGODiya de Alhad, mos fuimos a ver un filmo Israeliano ‘Ushpizin` en la eskola djudiya ‘Ulus Musevi Lisesi` en Estanbol. Direktado por Giddi Dar, este filmo resivio el Premio del ‘Mijor Filmo del Anyo` en Israel en el anyo 2004. (De aki estomos remersiando a los ke estan penando para trayermos tantos ermozos filmos i organizarlos en la eskola djudiya kada mes).

Judeo-Espanyol
9 Ocak 2008 Çarşamba
El filmo esta pasando en el kartel relijiozo de Yerushalaim, Mea Shearim. Es la fiesta de Sukot. Moshe i Mali, marido i mujer, estan rogando al Dio porke les afite un mirakolo. Eyos estan en un estado dezesperado, no tienen paras ni para komer, ni para aparejar una Suka. Sus kreensia al Dio es tanta grande ke, a la fin, el Dio oye sus orasyones i los mirakolos ke estavan tanto rogando, se realizaran uno detras de otro. Ma en embiyando mirakolos, el Dio, en mezmo tiempo, les embiyo difikultades para provar sus karakteres.
Moshe es un ombre ke tiene un pasado obskuro. Anyos antes, para pueder salir del kamino negro i topar el kamino derecho, Moshe izo 'teshuva' i se izo relijiozo.
Un diya, dos inesperados vijitantes (Ushpizin en ivrit), Eliyahu i Yossef, les sona la puerta. Estos dos vagabondos son dos amigos de manseves de Moshe. Moshe i Mali son muy kontentes de resivirlos porke en Sukot, la mas grande mitsva es de resivir djente i de selebrar la fiesta kon invitados. Marido i mujer estan muy alegre porke el Dio los oyo i les embiyo djente para partajar sus komidas.  Moshe i Mali se estan konsintiendo muy kontentes de sirvir estos vijitantes ke estan ambiertos i ke tienen menester de ayuda.
 Ma Eliyahu i Yossef, los dos fujitivos vagabondos, tienen todos los negativos aspektos del karakter de la persona. Malorozamente, esta vijita inesperada les traye munchos problemas a la kavesa.
 A la fin, kon la hospitalidad, la tolerensia i la pasensia Moshe i Mali reushen a meter estos dos vagabondos al kamino derecho i  enderechan todos los problemas.
En este filmo, en karakterizando Moshe i Mali, estomos viendo el eskarinyo del senaristo, Shuli Rand, por un mundo mas limpio i mas onesto ke las personas se olvidaron i lo desharon en el pasado.
‘Ushpizin’ es un filmo de kreensia i de amor. La luta de Moshe kontra la kolora i la dezesperansa, su pasensia tomando fuersa de su kreensia al Dio, lo estan ayudando a solver las problemas ke kada uno de mozotros rankontramos kada diya.
El mesaje del filmo es muy klaro i simple; Kon el progreso del karakter, la persona puede kontrolar sus negativos sentimentos. El Dio mos embiya munchos testos para provarmos i ayudarmos a progresar muestro karakter. Komo en el karakter de Moshe, en fortifiando sus sentimentos pozitivos ke son el amor, la pasensia i la kreensia, Moshe reushe a sovrepasar las difikultades ke esta rankontrando en la vida.
A la fin del filmo, el Dio, les esta embiyando una kreatura ke la dezeyaron por tantos anyos.  Kon este final,el filmo esta dando un otro mesaje ke se topa en la Torah ;‘Kale ke ayga kreaturas en una famiya porke la kreatura es la mas grande alegriya de una famiya’.
En salyendo de este filmo, el espektador tiene munchas temas de pensar ensima. El senaristo del filmo no esta dando dinguna eksplikasyon sovre los evenementos i lo esta deshando a la enterpretasyon de kada espektador.
Si se topa el DVD en muestra sivda, yo esto rekomendiendo a todos de ver este filmo merviyozo i de no pedrer los diyas de sinema organizadas en muestra eskola kada mez.