Una muy ermoza manyanada de Alhad

Una seremoniya ekstraordinarya en BarınyurtŞeli GAONUna fyesta inolvidavle el 10.12.2006 alhad demanyana en Barınyurt fue organizada para Klara Perahya; persona estimada i muy presyoza de muestra komunitad.

Judeo-Espanyol
9 Ocak 2008 Çarşamba

Klara PERAHYA

Alhad demanyana despues de una larga absensya de djusto un anyo,  tuve la alegria de ir de muevo al Barinyurt, esta vyeja fragua ke desde 15 anyos  avriga ermanas i ermanos ke se toparon a un syerto momento en el desmamparo  i ke  personalmente  konsideramos  komo muestra segunda  familya.
Kon todas las ermozas kozas ke se adjuntaron i adjustaron durante esta larga anyada,  topi este lugar mas resplandesyente ke syempre, no solo porke estava adornado por la fyesta, ma tambyen porke  se puedia ver sovre las karas de todos mis ermanos i ermanas, pansyoneres komo myembros,  un ermozo reflekto de kontentes..
Alhad demanyana, aunke no lo meresko enteramente, los dirijentes de muestra komunidad i todos mis kolegas i  amigos  me izyeron bivir momentos inolvidables de dulse emosyon i no se  komo rengrasyarlos.
Komo lo dishe en las kurtas palavras de agradesimyento ke pude pronunsyar, 17 anyos antes no avia en esta ermoza fragua ni  techo ni suelo, ni puertas ni ventanas... en basho  barras de fyerro sovre las kualas kalia pizar  kon grande prudensya i en las paredes ratonadas  por las flamas de dos terrivles insendyos, avyerturas ke mos paresian ser enormes.
Kada semana despues la seduta hebdomaderya, ivamos aya, kon muestra prezidente Gina Frayman i muestro vice prezidente Izak Bardavid, para refleksyonar sovre  lo ke se puedia azer de esta vyeja ruina  ferrida en sus entranyas.
Ansi ke es el kavzo por kaji todo modo de mueva kreasyon, i el Barin Yurt fue el rezultado de un largo esforso kolektivo kon el apoyo de la komunidad.
Era un tyempo difisil, de ezitasyones i envezes de kontroversyas, el tyempo del proyekto echo kon entusyazmo i en mizmo tyempo  anksyedad, ande todo paresia ser realizavle ma nada asegurado.
La sola koza ke rendyo posivle su egzekusyon fue  la Unyon... esta karakteristika del puevlo judyo ke asegura su perenidad...
Fraguar sin por esto absolutamente derrokar,
Renovelar sin nada renyegar
Adjuntar muevos elementos en esforsandomos de adjustarlos a los ansyanos  ainda valides.
İr adelantre en mirando de vez en kuando detras.
Bushkar puntos komunes al seno mizmo de las diverjensyas.
Nunka renunsyar enteramente a una idea ke mos parese ser djusta ma tambyen nunka enfoharmos sovre un solo punto.
Azer de la diversidad  una huente de rikeza i no de diskordya...
Esto sera syempre muestro  kodigo moral.