24 Novembre: El diya de las maestras

El objekto del Diya de Maestras es de akodrar a los governos i al puevlo, la nesesita de developar las kondisyones de lavoro de las maestras i de elevar sus status en la sosiedad. Lo mas emportante es, de amostrar a las maestras ke estamos apresiando los eforsos ke estan azyendo en aparejando una jenerasyon pronta a los rapidos trokamientos de la vida de oy.
Segun el grande edukador Dr. Sarvapelli Radharkrishnan, ‘Las maestras deven de ser los mijores meyoyos de un payis porke eyas son las ke dan la formasyon de los mansevos’.
Si pensamos ke un elevo pasa el tres kuartos de un diya en la eskola, puedemos entender el efekto de el medio de eskola i de las maestras en su developamiento.
Los mas emportantes modeles en la vida de los elevos son las maestras.
El dover de una maestra no es solo de ensenyar, ma es tambien de formar la vida de los mansevos kon grandes objektos i esperansas. En azyendo ganar a los elevos buenas kalitas, una maestra pena para ke sos elevos se apersivan de sus talentos i ensi, ke ganen propio konfiensia. Determinar objektos en la vida, krear muevas kozas, ser reushido i lo mas emportante, ambezar a gerrear kon los problemes ke se rankonra en la vida, son los doveres de una maestra.
En edukando, una maestra aze munchas kozas en djunto. Ensenya, orienta, enspira, ayuda al progreso akademiko, sosyal i emosyonal de sus elevos, ekspende sus horizones; en resume, les ayuda a avrir las puertas de una vida mijor.
O y, las personas deven de ambezar muevas kozas kada diya i de developar sus talentos para pueder alkansar los trokamientos kontinual de la teknolojiya. En los anyos dalkavo, la edukasyon i la ensensia trokaron de signifikasyon. Antes, ambezar era solo en las eskolas; oy endiya, ambezar esta kontinuando la vida entera. Kada uno de mozos, tenemos menester de ser estudiantes kada diya porke estomos en una epoka de asierto i de enformasyon. Los medios de komunikasyon mos estan prokurando todo modo de enformasyon. El kargo de las maestras esta ogmantando de diya en diya. Las maestras estan partisipando en kursos para developar muevas metodes de ensensia i para pueder alkansar a las reformas de edukasyon. Eyas mezmo tienen de ambezarsen kozas muevas para pueder ensenyar kon mas mijor kondisyones.
Oy, mas de siempre, las maestras tienen menester del suporte i del protejo de los governos i del puevlo para pueder sostener el kargo de estas responsabilitas. Esperamos ke kon tiempo esta profesion va ganar mas muncho prestij i los mansevos vana mas muncho eskojer esta bransh en el egzamen de entreda de las universitades.