Syete o ocho chikos tablos en un solo, reprezentando kada uno, si no me yerro, un bufalo o un otro animal de esta dimensyon.El primer mostrava la haya tal ke la vemos en la realidad o tal ke mo la imajinamos, kon su pelaje bruno, su korpulensya i sus kuernos byen vizivles... la secunda imaje manko demostrativa i ansi sigyeron las otras , simplifikandosen kada vez mas asta la ultima, eya kompuesta de unas kuantas linyas reprezentando la simple silueta de la haya....
Demandi la sinyifikasyon de este lavoro al ke me paresyo ser el prezentador de la egzibisyon... despues de un chiko momento de perpleksita ,el me respondyo en sonriendo “Frankamente, no se kuala fue la idea de baza del pintor , a mi pareser deve ser “la bushkida del esensyal”.
La repuesta era kurta, konsiza, muy konsiza. “La bushkida del esensyal” ke sinyifikava reelmente estas palavras? Kualo es el esensyal? Puede ser lo ke aze de una kriansa umana “una kriansa umana”, i de una haya “una haya”... lo ke las desferensya la una de la otra en sus “ser” komo en sus “pareser”?.
Puede ser igualmente la idea primera de kada koza... Ma ay tambyen lo ke se adjusta i kontinua a adjustarse al elemento de baza.
En pensando mas profondamente, una kestyon mos vyene al tino: Es ke tenemos mozotros simples mortales, el potensyal nesesaryo para pueder verdaderamente realizar esto?. Mos topamos tantas vezes undidos en un monton de chikas konsiderasyones de mundanidad, palavras sin sinyifikasyon reel, uzos i kostumbres ahuera del tyempo, inkulkados komo reglas absolutas de kondukta, los kualos munchas vezes eskuresen muesta vista i mos empiden de ver lo importante.
Kualo es lo djusto? ver los evenementos tal ke se prezentan a mozotros, en sus forma eksteryor o byen bushkar lo ke ay debasho la aparensya?... bushkar la sinyifikasyon de las kozas?... o byen kontentarmos de sus simple vista?
Kualo es la verdad? El primer elemento de un sistema bueno o negro?... o byen todo lo kel ombre en su ser de kriansa pensante izo o aze de el?
Preguntas i kestyones sin repuestas... Es ke son vanas? Puede ser si... puedeser no...a kada uno de entre mozotros, simple pasajeros, una sola koza mo fue dada: la posibilidad ,si no de “pueder topar” a lo manko “de pueder bushkar”..
Es lo ke es, la vida kedara syempre la sola verdadera valor para el ombre... Kon sus diyas de alegria i sus oras de apreto, kon muestras esperansas komo kon muestras revoltas, eya es la sola posivilidad de ser reelmente.
