Şeli GAONKeridos lektores,
Oy kero partajar kon vozotros una nochada ke pasimos, un grupo de 35 personas, en İhtiyarlar Yurdu Derneği, noche de myerkoles el 11.10.2006; una istorya de una vida de 60 anyos.
En 1946 se formo un grupo de sej personas amatores; laboryozos, sensivles i assiduos (yetenekli), para azer teatros.
Kon anyos, se engandesyeron, munchas personas partisiparon i se entegraron a este grupo.
Este grupo lavoro munchos anyos para el profito de Matan Baseter ke el presidente era maitre İlya Bayar.
Me esto akodrando ke el primer djugo fue Yosef Atsadik (Joseph vendu par ses freres).
La şena yena de los 12 ermanos, kon el makyaj i las vistimyentas de akel tyempo, i el dekor fabuloso, aviya echo un suksesso muy grande.
Despues de Matan Baseter el grupo lavoro para el profito de Yıldırımspor ke el presidente era el Dr. Mitrani.
Kuando se fondyo Dostluk Yurdu Derneği, estos aktores empesaron a meter en şena pyesas djudias i djugaron al profito d’el Dostluk.
Este grupo fue la baza, el fondamyento d’el teatro amator de los djudios en Estambol.
Kero nombrar estos sej aktores:
El rejisör era Albert Levi, el ke eskriviya i aziya las traduksyones Filon Kohen, el dekor kon los kostumes Yuda Leon Senegör, el efektör ke se okupava de la müzik Hayim Eskenazi, i los aktores eran Robert Susi kon İzak Amon.
Filon Kohen es el granpapa de Ferit Kohen; el mansevo de 22 anyos ke dirijo el teatro “Train de Vie (Hayat Treni)” kon 115 mansevos antes sej mezes en Profilo.
A parte aviya otros aktores i aktrisas, komo: Bensiyon Pinto, Luiz Levi(Filo), Zelda Natan (mi madre), Davit Arditi persona devuada ke era suflör en la şena, Dani Namer,Naim Kohen etc.
İzak Amon se muryo en 1979. En enterval de estos 30 anyos el d’alkavo fue Hayim Eskenazi ke es mi tio ermano de mi madre, muryo antes sej mezes. (Ke este en ganeden).
Estos amigos eran el simbolo de la kerensya, de la amistad, d’el amigable, d’el merito i de la solidaridad.
Mos amostraron i mos ambezaron el egzempyo de la kerensya, d’el respekto, d’el amigable i lo mas emportante; ke puedyeron bivir kon las famiyas endjuntos, sin selo, sin ambisyon i muncha umilidad.
Todos biviyamos en un sentro en Heybeliada unos allados de otros. Mos engrandesimos endjuntos i partajimos muncho en la vida.
Malorosamente en el mez de Marso 2006, peryimos a mi tio Hayim Eskenazi; i resivimos kondoleansas de todos los ijos de estos amigos. Mi madre (Zelda Natan) estuvo emosyonada de este kudyo i tuvo una idea briyante.
La bushko a la ija de İzak Amon (Tina Amon Abohayra), i le dicho: Todos vos kazatej i tenej vidas diferentes; ma esto no es una kavza para aunar a todos las ijas, ijos, madres una vez al anyo para komemorar a estos padres; ke eran los primeros aktores de muestra komunidad.
Eran el egzempyo de la amistad, de la tolerensya, de la armonia, de la unyon i de la fidelidad. Eran tantos aunados ke munchos se enselavan.
Enfin antes doz mezes Tina me bushko i me dicho ke esta organizando una nochada para arekojer a todas las famiyas de estos keridos padres, ke ya avizo a los ke estan en İsrael, en la Amerika i en la İngiltera. Kuando todos ya afirmaron ke van a vinir; Tina penso ke la data la mas konvenible es Sukot ke es una fyesta de la kerensya, i de alegria.
Ay djente ke estan lavorando, las 10 personas ke vinyeron de İsrael estavan en vakansas.
Kerer es pueder; los ke estavan mizmo en viaje asistyeron a esta nochada inolvidavle.
Teniya savor ke esta komemorasyon fuera en el Dostluk, porke eyos lavoraron por esta organizasyon!...
Enfin; mos topimos en İhtiyarlar Yurdu i fue una nochada maraviyoza.
En primero Tina mos avlo de este grupo muy presyozo, lo ke izyeron; los teatros ke djugaron; en Saray Sineması, Tepebaşı Dram tiyatrosu, en Maxime i otros lugares. Kero citar
unos kuantos: Anne Frank, Dreyfus, Yosef Atsadik, Davit ve Batşeva, Los Maranos, Rambam i munchos otros...
El salon de İhtiyarlar Yurdu, estava organizado komo una boda, byen aklarado, byen duzudeado, las mezas ornadas; el menu muy delikado.
Estuvimos byen sirvidos por el personel. Paresiya a un salon de un otel, appropriado para mozotros solos.
La topadura de los ijos, ijas de este grupo fue muy emosyonante, porke todos estan en una parte diferente, ke aviya anyos ke no se vian.
Kuando mos topimos estas 35 personas; bezos, abrasoz, yoros, i todos se akodraron de kozas diferentes, de kantikas kuando eramos chikos, de rekuerdos de antes 40 anyos, kon una atmosfera muy kayente.
Mos asentimos a komer; i avlando, riendo, akodrando de la chikes, komimos kon repozo las komidas ekselantes.
Entornados en el doredor de la meza; felisitimos Tina ke organizo esta nochada.
Despues de komer mi madre Zelda Natan ke era una aktrisa de este grupo; empeso a kontar munchos evenementos ke bivyo, seyga en la şena, seyga entre los amigos; i se akodro todo lo ke pasaron en estos 60 anyos, los evenementos kon kada uno i uno a parte.
Todos mozotros oyendola kon atansyon, tanto riimos, tanto yorimos.
Esto sureyo kaji dos oras. A las 12 de la noche mos espartimos kon la promesa ke va mos a organizar syempre esta reunion kon todos endjuntos...
