La komemorasyon en el onzen anyo del asesinato de Yitzhak Rabin

Noche de Alhad, en el onzen anyo del asesınato de Yitzhak Rabin, mas de 100.000 Israelianos se arekojeron en la Plaza  Rabin, ande el Primer Ministro fue asesinado por un djudyo ekstremisto en el anyo 1995.
Akeya noche, la Plaza Rabin estava tanto yena ke el puevlo estavan desbordando a las kalejas del kontorno.  Munchos mansevos partisiparon a la asamblea kon pankartes en las manos, kon los biervos ‘Paz’ i ‘Tolerensia’ eskritos enriva de los pankartes.
Komo todos lo savemos, en el kuatren diya de November del anyo 1995, Yitzhak Rabin fue asesinado por un ekstremisto djudyo, opuesto de la politika del Primer Ministro.
Noche de Alhad, el eskridor Israeliano David Grossman, ke peryo su ijo en la gerra del enverano ke pasimos, dio un diskorso i kritiko los administratores del payis por no pueder tener vision buena. Grossman se adreso a los lideres i los yamo a azer mas munchos eforsos por prokurar la paz entre Israel i los Palestinianos. Segun Grossman, el payis tiene menester de un empesijo muevo por alelantar la vida i aparejar a los mansevos un futuro luminozo.
La asamblea empeso kon el filmo del diskorso de Rabin adresado a los oyentes el diya del asesinato. En su diskorso, Rabin estava remersiando los partisipantes ke se reunieron en este lugar por sustenar la tema ‘A La Violansia No, A La Paz Si’.
En el balkon por ande Yitzhak Rabin se adreso al puevlo onze anyos antes, este anyo kantadores Israelianos kantaron kantikas de paz i kantikas kompozadas en el nombre de Rabin.
De otra parte, en el onzen anyo del asesinato, segun el resultado de una anketa, el trenta por syen de la populasyon de Israel esta pensando ke el asesino de Rabin deve de ser pardonado. Este shifro esta ogmantando a sukuenta por syen entre la populasyon de los relijiozos i de los derechistos del payis. El anyo ke pasimos, solo el diziocho por syen del puevlo estava konsitiente a pardonar al asesino.
Una grande partida del puevlo esta pensando ke kale keYigal Amir seyga permetido de salir de la prizion de ves en kuendo i seyga permetido de vijitar su mujer. ‘El kamino del asesino a  la libertad ya  se le avyo’ esta dizyendo Yuval Rabin, ijo de Yitzhak Rabin. ‘Si me demandash lo ke esto pensando, la sola koza ke vos puedo dizir es ke me esto sintiendo furiozo aryento del korason. Mezmo si me opozo a esta situasyon, ya se ke no puedo trokar el resultado de nada porke esto es un echo nasyonal i no un renkor entre dos famiyas. Esto es el echo de los otorizados del payis. Si diez anyos antes me diziyan ke un diya el asesino de mi padre iva ser pardonado, no me puediya kreer. En el futuro, si un diya afita un otro asesinato politiko, akeya ves los administratores vana entender el yerro ke izyeron’.
Komo lo savemos, en el anyo 1933, en afirmando el akuerdo de Oslo kon los Palestinianos, Yitzhak Rabin gano la admirasyon de los ke son de la vanda de paz, ma en mezmo tiempo el renkor de los ekstremistos. En el anyo 1994, kon este akto, Yitzhak Rabin resivio el Premio Nobel de la Paz juntos kon Shimon Peres i Yasser Arafat.
Yitzhak Rabin djugo un grande rolo en la prokurasyon de la paz entre Israel i los Palestinianos. El nombre Rabin va ser siempre nombrado komo el sembol de la paz en el mundo entero. Esperamos ke un diya, la paz en el Medio Oriente, ke Rabin dezeyo tanto se va realizar i no va ser mas solo un eshuenyo utopiko.