Henri Yaºova muryo...Malgrado su ardor de bivir i su lucha insesante, malgrado el kudyo i la kerensya de sus serkanos, sin la mas chika kesha ni el meno byervo de revolta, Henri Yaºova muryo, vensido por un mal inegzoravle.
La komunidad Djudia de Turkia pyedro uno de sus myembros los mas presyozos. Korajozo, sezudo, muy umano, djusto i perspikas en su manera de pensar, syempre pronto a oir i entender el ke se adresava a el por un konsejo o por simplemente tomar su opinyon sovre un kualkyer problema, Henri Yaºova era avyerto a sus proksimos sin nunka kaer en la indiskresyon .
Kon su grande sagasidad i su maraviyozo potensyal de komprensyon, el fue munchas vezes solisitado a okupar los mas altos postos administrativos de muestra komunidad ma kaji syempre el prefero kedar leshos de las luzes sentiyantes de la shena sosyal, para mijor lavorar i mijor ayudar.
Mas ke un administrador, el era un Giador. Su filozofia de la vida repozava sovre la bushkida de la estabilidad i tambyen sovre la komprensyon del otro.Ansi, por un largo tyempo el enkaveso una mansevez briyante ke kedo asta agora imprenyada de su manera de pensar,la kuala era “Ser syempre atado a los prinsipyos etikos de baza sin nunka ser intransijente… Ser diskreto sin ser indiferente”.
A su ija i su ijo, su ermuera i su yerno, a sus inyetos, sus ermanas,kunyada i kunyados, a mozotros todos sus amigos ke lo konosimos mas o menos de serka, i a muestra komunidad entera , muestras sinseras kondoleansas i la ekspresyon de muestra profunda tristeza.
