Es verdad ke ay una grande differensya en doz anyos. Botikas Italyanas, chikos sentros de komerso, todas las markas famozas, kafe i restoranes komo en la Evropa. Muestra primera destinasyon fue Plovdiv konosida por el nombre Filibe en el tyempo de los Ottomanos. Kaminos anchos, muncha verdura, parkos i arvoles. La sivdad tyene tres tepes; es por esta razon ke los Romanos la yamavan Trimontium. La vyeja sivdad en los tepes se konservo egzaktamente komo era un tyempo. En kavakando para fraguar el var Maria Luiza toparon una vyeja sinagoga del treser siglo. La yaman oy la sinagoga antik. En esta sivdad de 600 mil abitantes moran 500 judios. Una sola sinagoga avyerta para las orasyones. En la entrada ay una plaka komemortiva los nombres de los judyos ke gerreyaron kon los patriotes kontra los Nazis.
Danyda en la guerta aviya la suka. Aryento asemeja al kal Yambo l de Balat. No tyenen haham. Si se lez aze menester yaman el haham de Sofia. Remarki ke no aviya guardia komo los ke tenemos en Estanbol. Muestra sigunda destinasyon era Sofia. El kal esta custo en el sentro de la sivdad. Un kal grande i somptuozo. Estan azyendo reparasyones grasyas al ayudo vinido de Amerika. Aryento la sinagoga no tyenen enstalasyon de kalorifer i el governo no les permete de meter buris ke es feyo. Tanbyen las eglisyas no tyenen kalorifer. En invyerno aze 15 grados de debasho de zero i es emposible de azer las orasyones. Tyenen un midrash para los tyempos yelados. Al anyo ay trez kazamyentos i unos kuantos brit milla. En Sofia ay un milyon i dozyentos mil sivdadinos donde los tres mil son judios. Savesh komo yamavan a Estanbol? Tsarigrad, deve dizir:tsar=rey, grad=sivdad; la sivdad del sultan. En las fyestas el kal es yeno. Noche de Shabat vyenen los mansevos i dia de shabat los yahid.
La sivdad areskura de un tyempo ya se esta aklarando. Los edifisyos enblankesidos ya paresen a los ke vemos en las grandes sivdades de la Evropa. Lez demandi si estavan kontentes de ser un miembro de la evropa. La repuesta fue una sorpreza para mi. Komo tyenen una mezada muy basha pensan ke sera difisil para los ke son de una sierta edad. Pensan ke sara bueno para los inyetos!
