En un artikolo en Aki Yerushalaim, Moshe Shaul esta dizyendo ke segun algunos eskridores, la ovra de Cervantes puede ser entendida mijor solo si akseptamos ke Cervantes era un ‘kristiano muevo’ (konverso).
Komo lo savemos todos, en el diisejen siglo, duspues de la ekspulsion de los djudios de Espanya, munchos djudios se konvertieron a la relijion kristiana para salvar sus vidas i para pueder kedar en Espanya. Ma esto no les servio muncho, porke los ‘vyejos kristianos’ se enemisaron de eyos i les defendieron de entrar a la armada, a los ordenes relijiosos i de tomar sertanas profesiones. Para tomar estos postos kaliya provar ‘la pureza de su sangre’. Por esta razon, munchos konversos teniyan profesiones komo medikos, komersantes, administratores i kolektores de taksas ke eran profesiones de los djudios akeyos tiempos.
En este artikolo, el eskridor esta dizyendo ke el padre de Cervantes teniya un ofisio sanitario (komo mediko) i ke el lavoro vente anyos komo kolektor de taksas i fue arestado por la Inkizision. Estos sinyos estan azyendo sospechar la identidad de Cervantes.
Segun Prof. Leandro Rodriguez, el eskridor del livro ‘Miguel, Djudio de Cervantes’, el livro de Cervantes esta reflektando los sintimentos de revolta i de protesta de los ‘kristianos muevos’ enverso la sosiedad espanyola del diisejen siglo. En ‘Don Quijiote de la Mancha’, Don Quijiote esta dizyendo ke ‘el bivia en un kazal de la Mancha, ke no se estava akodrando el nombre’. Rodrigez esta diziendo ke Don Quijiote teniya ‘una mancha’ i no puediya provar ‘la limpieza, la pureza’ de su sangre i no se estava akodrando el nombre de su kazal porke los konversos bivian kon espanto ke un vizino los puede dar en mano i pueden ser investigados por la Inkizision.
Segun el Prof. Rodriguez, Cervantes nasio en Sanabria (ande biviyan munchos djudios i konversos) ma el eskondio el nombre del lugar de su nasimiento komo lo aziyan munchos kristianos muevos’, para ke no ayga en las manos de los enimigos sinyos para akuzarlos de ser ‘konversos’.
En el livro de Rodriguez ‘La Vida de Don Quijote en Sanabria’, el eskridor esta diziendo ke dingunos no pueden deskribir la tierra, el ayre, la jeografia de Sanabria mijor de Cervantes.
En el livro de Cervantes, Don Quijiote insiste ke las personas ke el enkontro en su kamino avlaron de la ermozura de Dulcinea, malgrado ke no la konosen i ke no la vieron nunka. Segun Rodriguez, la figura de Dulcinea es una metafora de la ‘Shehina’ ke es la Prezensia Divina en la relijion djudia.
Aparte de Prof. Rodriguez, ke afirmo kon munchos detalios ke Cervantes era desendiente de djudios, ay otros investigadores ke pensan eyos tambien ke Cervantes desho en su livro munchas indikasyones de su personalidad djudia.
El Prof. Brown ke izo munchas investigasyones sovre la Inkizision, esta konsiderando ‘Don Quijiote’ komo uno de los livros de la persekusion djudia ke deskriven las vengansas kontra los djudios en la istoria. Segun el Prof. Brown la kritika de Cervantes kontra la Inkizisyon en el livro, las mensiones negativas del kompartimiento de la Inkızısyon puede ser de las memorias personales de Cervantes. Es verdad ke no ay pozisyones favorables al djudaismo en el livro, ma Brown esta diziendo ke no puedia aver pozisyones pozitivas en la atmosfera negativa kontra los djudios de Espanya del diisejen siglo.
Estos argumentos no reusheron a konvenser los investigatores de Cervantes de sus rayizes djudias. Ma es muy siguro ke el livro ‘Don Quijiote de la Mancha’ reflekta una kritika vigoroza kontra el komportimiento de la sosiedad espanyola del diisejen siglo kontra los ‘kristianos muevos’, ovligandolos a tener una doble vida i a bivir en una atmosfera de espanto kontinual de kayer en manos de la Inkizision.
