KUENTOS I LEJENDAS

Klara PERAHYAA la sigida de largas deliberasyones, los premyos Nobel del anyo 2006 fueron atribuidos de la manera sigyente: Ekonomia: a “Edmund Phelps” (Amerikano) por su lavoro kontra el dogma Neo liberal. Medikeria i Fizyolojia: a “Andew Fire i Graig Mello” (Amerikanos) Kimika: a “Roger Komberg” (Amerikano). Fizika: a “George Fitzgerald i John C Mather” (Amerikanos). Literatura: a “Orhan Pamuk” (Turko). Paz: “Muhammad Yunus i su

Judeo-Espanyol
9 Ocak 2008 Çarşamba

Coya DELEVİ

El simeteryo de versailles
Un diya del anyo 1788, en partyendo kasar (avlanmak), el Rey Louis XVI estava de muy buena umor...En el kamino, serka de la Shara (orman) de Rocquencourt, a un syerto momento, uvo komo una konfuzyon (karışıklık) entre los soldados de la guardiya real. La karosa se arreto kon bruskedad...
Kuryozo,  Louis XVI se aparo por la ventanika de la karosa...Enkantado, vido kuatro nikochiris (yaşlı) de fizyonomiya estranyas, kon largas barvas blankas, i vestidos grizos de una ropa bastante grosyera...Estavan yevando ensima los ombros, una sedya (o una koza semejante), kon una levaya...Detras del kortejio funebro, vido tambyen, dos mansevos, en lagrimas i las vestimyentas kaji arasgadas, lo ke era sinyo de dolyo (matem). Un grupo, de aparensya oriental, todo en meldando una orasyon en una lingua ajena, estava avansando kon gravidad a pasos chikos.
El Rey trublado (rahatsız) de esta aparisyon, kijo kitarse el chapeo en un djesto inveluntaryo, i azer el sinyo de la croche (haç). Demando eksplikasyones ke le fueron dadas por el kapitano de la guardiya:
“ Su majeste ke me perdone por el retardo ke kavzaron esta djente. Ya les dishe a mis soldados de pasar en medio de este grupo de Djudios.”
“ Kualo? Djudios? “ repeto kon enkanto el Rey.
“Si Majeste. Desde un syerto tyempo, un grupo de estos apikoros (dinsiz) vinyendo de l’Alsace i de Metz,  tuvyeron la ozadiya de instalarsen en vuestra ermoza sivdad de Versailles. Estan azyendo la fabrikasyon de objektos en oro i plata, de parfumeriya i el negosyo de vyejas vestimyentas...
“Bueno, ke echo tyenen en esta shara”, demando el Rey.
“Asigun lo ke entendi del jargon tudesko (almanca) ke avlan, no keren enterrar sus muertos en el simeteryo Kristiyano. I, komo no tyenen otro remedyo son ovligados de irsen a Paris, al simeteryo Djudio de Montrouge.”
“Poveretos!..”respondyo el Rey, “tyenen de azer ansi, tan largo kamino!..”
La karosa del Rey indose verso Saint-Germain, ande ivan a kasar, myentres ke el grupo de Djudios kontinuo a pasos avagarozos en la direksyon de Paris. Paresiyan kompletamente dezenteresados del enkontro kon el Rey de Fransya, tan “embafados”( acı içinde) en sus dolyo.
Verso la tadre, el Rey i su korte (maiyet) estavan de retorno a Versailles, ke ya se estava vyendose al orizonte. En esto, un arrekojimyento de personas, akompanyados de un grupo de papazim, dyeron kamino a la karosa del Rey. Ma, el sovereno ya tuvo el tyempo de apersever un serkolyo ornado de una manera somtuoza.
“Es el enterramyento de un riko merkader de la rejyon” ekspliko el kapo de los soldados, al Rey. El no respondyo, ma, se estava vyendo ke teniya una preokupasyon. Durante la noche entera, estuvo djignisheando kon sonyos funebros. Demanyana yamo a su ministro De Malherbes. Le dyo a entender los penseryos ke tuvo a la vista de dos enterramyentos tan diferentes, tanto kontrastando...
“Todos los Fransezes son mis ijos, si o no? Deke la diferensya de relijyon deve ekskluir (dışlamak) una partida de mis sujetos?” Fue despues de esta konversasyon, ke por primera vez, se organizo una enkuesta. Se demando ke manera se pudiya mejorear la pozisyon de los Djudios de Fransya. I, la Historia konservo estas ermozas palavras de Louis XVI:
“Monsieur De Malherbes, nasitesh Protestante, i yo, vos esto azyendo Djudio!” De Malherbes, syempre protektor de los derechos umanos, rengrasyo el Rey por este djesto, ke era una preva de favor (lütuf). Estava kontente de pueder partisipar a la reparasyon ke se iva realizar en favor (lehinde) de los Djudios Fransezes. El Rey adjusto: “Vos rogo de okuparvos tambyen, de dar a los Djudios de Versailles, un pedasiko de tyerra para enterrar sus muertos.Si no ay bastante terreno, al menester, ke tomen de mi parko real!”..Este akto manyifiko fue kumplido. Los Djudios del mundo, vijitando el Chateau de Versailles, se van akodrar kon rekonosensya, del Rey Louis XVI  i su vertuozo ministro De Malherbes...
Los Djudios de Alsace, eskojyeron Cerfberr komo sus reprezantante. Lo embiyaron a Versailles para solisitar  Louis XVI en sus favor. En la sala aviya tanto puevlo, ke, Cerfberr tuvo ke asperar muncho. Las oras pasando, ampeso a meldar la MİNHA, ke se deve dezir antes la venida de le noche. En un kanton del salon, en su orasyon, no vido, no sintyo el responsavle dizyendole ke el Rey estava pronto para aresivirlo. Cerfberr sin dar importansa a la sanya (öfke) del ombre, kontinuo su orasyon. No se domeyo de su lugar (yerinden kımıldamadı). I, unos, kuantos puntos despues, admetido delantre del Rey, le disho:”Ay un solo MONARKO mas grande ke Su Majeste, es el Todo Poderozo. Es al lado de EL, ke estava yo.”
Louis XVI, ya konosiya el patriotismo (vatanseverlik) de Cerfberr, i tambyen, el atamyento a su Fey. Fue ansi, kon muncha grasya, ke acheto sus eskuzas, i su solisitasyon en favor de los Djudios..

A. Weil “Contes et Légendes d’Israel”