Fundado desde el anyo 1901, el premyo Nobel konstitue por seguro uno de los puntos los mas altos de la reushita al kual aspira todo modo de kreator en kualkyer ramo de la “sensya”, “literatura” o “aksyon umanitarya ke viza a asegurar la paz i la armonia en el mundo”.
Resivirlo es la konsegrasyon de un largo lavoro al kual un ombre o un grupo de ombres dedikaron sus vidas en el esforso kontinual i puede ser en la privasyon i la insertitud. Ansi, el immortaliza el eskritor, el savyo o la aksyon sosyal ke lo merese.
Resivirlo es tambyen enalteser el puevlo al kual el loreato apartyene….los motivos de esta atribusyon son inombravles: kualidad de eskriturya, bushkidas i deskuvyertas syentifikas, aktos ke tyenen komo eskopo el kombate kontra la muerte, la mizerya i la injustisya afin de asegurar el adelantamyento del umano en su ser komo en su dinyita.
Muhammad Yunus al kual fue atribuido el Premyo de la Paz es djustamente uno de entre estos luchadores. Profesor de ekonomia en Bangladesh uno de los mas proves payizes del mundo el fundyo en el anyo 1976 la “Banka Grameen”, ke tyene komo funksyon de emprestar a los mas proves, sin el meno intereso bankaryo, un chiko montante de moneda para la kreasyon de un modesto echo ke les permetra de no deshar murir de ambre sus famiyas.
Este sistema byen entendido es muncho mas valorozo ke la byenfezensya tala ke fue pratikada asta agora. El no da solamente pan al menesterozo, el le da la posivilidad de ganarlo personalmente, a la sudor de su propya frente. El sovretodo lo pusha a azer el esforso personal mesesaryo para salir de su mizerya grasyas a su propyo lavoro
El montante inisyal ke servyo a la kreasyon de esta banka fue avansado por Muhammad Yunus el mizmo. Kon el tyempo se adjuntaron donasyones de amigos i paryentes. Kaji todos los emprestimos echos fueron restituidos gradualmente ...
Por seguro no es la opulensya ke Mohammad Yunus ofrese a los menesterozos del Bangaldesh ma en todo kavzo el ermozo orgolyo de pueder asegurar una vida onoravle a sus famiyas, de no ser tributaryos de ninguno, salvo de su propyo lavoro.
Si no me yero, muestra komunidad de Estambol tenia tambyen un semejante sistema debasho el nombre “La banque des Petits Prets” ke permetyo a munchos chikos komersyos de desveloparsen i mizmo enfloresersen.
En dando a los mas proves la posivilidad de pueder trokar sus destino, este sistema les da tambyen la responsavilidad de sus avenir komo la del avenir de sus ijos, les da la konsensya de todo lo ke puede trokar en sus favor a kondisyon de partisipar eyos tambyen, kon sus esforsos, a esta tentativa de desvelopamyento.
Dar a una persona abatida por la mizerya “la posivilidad de mejorear su egzistensya” es en mizmo tyempo meterla facha kon facha kon su propyo destino, es darle konsensya de su propya responsavilidad i arrankarla ansi de esta terrivle impasivilidad de los ke no tyenen mas nada de asperar del destino.
En sus grandes linyas el komite del Premyo Nobel konfirmo, komo lo aze kada anyo, su eskopo de rekompensar las verdaderas valores umanas, las ke tyenen komo baza “la lucha kontra la sufriensa i la umilyasyon”, “el adelantamyento sosyo-kultural de la populasyon mundyal”, ansi ke “la bushkida de la Ekidad, Justisya i desvelopamyento Umano...
