Ke son los elementos de un kazamiento reushido?

Dora NİYEGO

En los vyejos kazamientos, el rolo tradisyonel de la mujer era de okuparse de su kaza, de su marido i de sus ijos i tomar solo la responsabilita de su famiya. Muestra relijion apresio la mujer solo en siendo madre porke esto es esansiel por la kontinuasyon de la famiya.
Lo ke era valable miles de anyos antes no es valable mas oy. Oy la diferensia entre los dos seksos esta aminguando de diya en diya. En los anyos dalkavo, la mujer empeso a djugar un rolo mas aktivo en la vida de negosios. Las mujeres enstruidas ke tienen una profesion tienen razon de kerer egzijar sus profesyones. Komo konsekuensa, munchos problemes empeso a kreser kon el trokamyento del rolo de la mujer en la sosiedad.
En el mundo entero, las investigasyones efektuadas sovre los motivos del divorso estan amostrando ke las mujeres ke tienen una karyera i ke estan ganando mas muncho de sus maridos tienen mas muncho tendensia al divorso.
Esto esta amostrando ke los mansevos dainda no konosen bueno la sinyifikasyon del matrimonio.
En un kazamiento, antes de todo kale ke ayga konkordansia entre marido i mujer. No kale ver el kazamiento komo una kompetisyon. En la vida moderna, los rolos del ombre i de la mujer empesaron a trokar en kada kampo, i komo konsekuensia el perspektif del kazamiento ke es la mas vyeja institusyon de la sosiedad empeso a trokar.
En un kazamiento reushido, la mas emportante koza deve de ser la relasyon matrimonial del marido i de la mujer. El biervo ‘Mozotros’ kale ke venga antes del biervo ‘yo’.
En la boda, el novio i la novia se dan palavra de kontinuar el kazamiento fin al eterno, en el diya bueno i en el diya negro. Ma en el empesijo, los mansevos no se konsienten ke egsitar esta palavra nesesita el sakrifisyo i la tolerensia de las dos partes.
En la vida moderna, los rolos del ombre i de la mujer no son mas limitados komo eran antes. Es siguro ke en un kazamiento komo en kada institusyon kale ke ayga divizyon de lavoro. Ma esta divizyon de lavoro kale ke seyga segun el asierto del ombre i de la mujer. En una famiya el ke es mas organizado paga las fakturas. El ke es mas avanturiye organiza los viyajes. El ke es mas ekonomiko regla los echos de paras. El ke tiene mas muncho tiempo libro se okupa de las kreaturas i del echo de kaza.
Una koza ke los konsejeros de matrimonio estan repetando kontinualamente es ‘El kazamiento no es una kompetisyon ande el ke aze mas munchos skores gana’.
El ombre o la mujer, el ke gana mas munchas paras deve de gastarlas por el bien de la famiya. Si kada uno aksepta ke en una famiya ‘mozotros’ vyene antes de ‘yo’, i ke el bien de la famiya viene antes el orgolyo, no ay dinguna razon porke los kazamientos no kontinuen...