Una desizyon arbitrarya

Klara PERAHYA

Estos dalkavos mezes la Fransya tomo la desizyon de promulgar leyes de aparensya umanitaryas, lo ke reelmente azera onor al payis i al su governo aktual a la kondisyon de koresponder tekstualmente a la realidad.
Entre otros dekretos propozados a la Kamara, se topa el ke demanda la pena de enkarselamyento por “negasyonizmo del pretendido jenosidyo perpetrado por los Turkos kontra los ermenis.”
El problema es komplekso i aze el objekto de grandes disidensyas entre los istoryanos kontemporeanos ma la utilizasyon en este kavzo de la palavra “jenosidyo” es reelmente sorprendente en la boka o debasho la pendola de ombres de estado fransezes.
Aunke konosko la sinyifikasyon egzakta de este byervo, konsulti de muevo dos diksyonaryos de los kualos traduzi tekstualmente i integralmente lo ke dizen :
El “Petit Robert” mos da la sinyifikasyon sigyente: “Génocide(jenosidyo) del grego Genos (rasa) i sufikso Cide: - Destruksyon metodika de un grupo etniko. (La eksterminasyion de los judyos por los Nazis es un jenosidyo)”.
El diksyonaryo Larousse: “Génocide (jenosidyo) del grego Genos (rasa) i del latino ‘’caedere’’ (matar): Krimen perpetrado kon la intisyon de destruir un grupo umano, nasyonal, etniko, rasyal o relijyozo.”
El Petit Robert tyene razon de atribuir la palavra “génocide” a la eksterminasyon de los Judyos por los nazis. Esta palavra fue espesyalmente kreada en el buto de definir un krimen de dimensyon inimajinavle asta la epoka del nazizmo, reel krimen kontra la umanidad, aparejado metodikamente kon la intisyon de destruir el puevlo Judyo sin tener nada de grave a reprosharle.
Ay una diferensya inkomensuravle entre los dos kavzos.
De una parte: el fakto de elaborar por razones unikamente etnikas un akto de eksterminasyon total kontra una populasyon sin kulpa ni ninguna posivilidad de rekorso a kualkyer ayudo… de aparejarlo de sangre fria, voluntaryamente i metodikamente, despues de largas deliberasyones sovre el sujeto i sovre su modo de aplikasyon, sin tomar en konsiderasyon el kontenido de salvajeria ke este akto komportava. 
De la otra parte: a una epoka ande el İmperyo Otomano era en estado de absoluta dekadensya, entornado de enemigos oksidentales komo orientales, la reaksyon enverso la traisyon de sitizanos de nasyonalidad Otomana ke se aunaron al enemigo para kuchiyarlo en la espalda.
Kuala fue la dimensyon del akto de vengansa de los otomanos de la epoka? los istoryanos son divizados a este sujeto.Grandes istoryanos komo Bernard Lewis toman la defensa del Imperyo, otros lo akuzan de jenosidyo sin tomar en konsiderasyon el pezgo de esta palavra, ni las sirkunstansyas trajikas en las kualas (si akto uvo) el fue perpetrado...
No se puede komparar la desizyon inyovle de eksterminar un puevlo por razones unikamente rasyales i un kualkyer akto de sanya (echo o no echo) kontra personas ke traisaron sus propyos payiz en estado de derrota.
La palavra “jenosidyo” tyene un kontenido semantiko muy grave i ay muncha probabilidad ke los desendyentes de Descartes i de Pascal, naturalmente imprenyados de rasyonalizmo i umanizmo retornaran a una desizyon mas ekitavle.