Tiempo del espanto...

Aslan I. PALACHI

Ay un poko de tiempo, la sivdad de Toronto fue la shena de una konferensya internasyonal sovre el estado de salud de los puevlos afrikanos (AIDS). En kavesera de esta reunyon estava Bill Clinton, el eksprezidente amerikano, ke se preokupa por la djustisya sosyal en el mundo. De otra vanda, kon la komemorasyon de los akontesimientos del 9/11, el prezidente aktual amerikano, glorifika la seguridad, establese i sembra el espanto en su puevlo i en todo el mundo, debasho el preteksto de la "sivilizasyon" i la "demokrasiya." Tambien, el, uza el TERROR para kitar las libertades siviles en su payis.
El espanto es el materyal de las rikas industriyas de la seguridad privada i del kontrol sosyal: enflorese el merkado de las polisias privadas i las prizyones privadas, mientres ke todos, ken mas, ken menos, nos vemos prizyoneros del espanto. Nunka uvo tanta konsentrasyon de moldes ekonomikos i de konosimientos syentifikos i teknolojikos dedikados a la produksyon de la muerte. Los paizes ke venden mas armas al mundo son los mizmos paizes ke se enkargan de la paz mundyal.

El espanto global
Los ke lavoran tienen el espanto de pedrer el lavoro.
Los ke no lavoran tienen el espanto de no enkontrar nunka lavoro.
El ke tiene el espanto al ambre, tiene el espanto a la komida.
Los otomobilistas tienen espanto de kaminar i los peatones tienen espanto de ser trespizados.
Los siviles tienen espanto a los militares, los militares tienen espanto a la falta de armas.

Es el tiempo del espanto
El espanto de la mujer a la violensya del ombre i el espanto del ombre a la mujer sin espanto.
El espanto a los ladrones, el espanto a la polisia.
El espanto a la puerta sin serradura, al tiempo sin ora, a la kriatura sin televizyon, el espanto a la noche sin hapes (pastiyas) para durmir i el espanto al dia sin hapes para despertar.
El espanto a la muchedumbre, el espanto a la soledad.