Preguntas sin repuestas

Av. Nusret Kadri SOYCANBu haftaki sayımızda okurumuz Avukat Nusret Kadri Soycan`ın derlediği araştırmaları, anıları ve düşüncelerini içeren metnini yayınlıyoruz. Soycan, anılarından yola çıkarak, bir dönem Edirne Yahudileri`nin tarihini, 1934 Trakya olayları ile II. Dünya Savaşı ve gölgesindeki gelişmeleri değerlendiriyor

Judeo-Espanyol
9 Ocak 2008 Çarşamba

Klara PERAHYA

Una pregunta es esensyalmente una bushkida,la bushkida de una repuesta ke munchas vezes savemos no pueder nunka topar.
Ansi, la semana pasada tuve la okazyon de asistir a un debate sovre el ekstraordinaryo progreso realizado desde unos kuantos anyos  en la sensya i la teknika  en jeneral.
En efekto es una  realidad irrefutavle ke en el espasyo de un siglo, maraviyozas deskuvyertas i invensyones fueron echas ke trokaron muestra manera de bivir, empesando por la elektrisita, la radyo i la televizyon, oy el internet, el otomobil mas o menos fasilmente aksesivle, el aeroplan, los medyos de komunikasyon de dia en dia mas perfomantes etc... etc...
Malgrado la mekanizasyon eksesiva ke amenguo terrivlemente la importansa i la demanda de syertos ofisyos manuales, munchos otros fueron kreados al mizmo nivel de kompetensya i se puede dezir ke en el mundo oksidental , kada uno (segun su kapachidad i la kualidad de su lavoro) puede alkansar a lo ke 50 anyos antes yamavamos “objektos de lukso”.  
Ma es ke la umanidad esta mas oroza ? Es ke la persona arta de byenes ma kontinualmente akosada por muevos dezeos la mas parte del tyempo artifisyales,  ayego a un verdadero estado de kontentes?
Un grande eskritor fransez avia dicho  ke “la felisidad es mas una fakultad ke un evenemento” ...En effekto oy en dia mos olvidimos de ser orozos, de  ver los elementos pozitivos ke se topan envezes  mesklados a los negativos...mos olvidimos komo eskabuirmos de este  pesimizmo i sovre todo de este septisizmo malorozamente inseparavle de muestra epoka.
El benadam se olvido de riir reelmente,  komo si el dezeo de “syempre pareser mas de lo ke es” lo detyene de azerlo... Perpetualmente obsedado por la divinizasyon de su ”yo” , pushado por una fuersa irrezistivle a kerer kontinualmente mas obtener i mas amontonar, el se olvido de ser “si mizmo”.
Me akodro la kara arrelumbrada de un novle orgolyo de mi madre kada vez ke eskapava una broderia... Aunke le plazia muncho meldar i tambyen jugar kartas , “lavrar” era su pasatyempo preferado, una manera de afirmarse en un simple lavoro echo de sus propyas manos i esto lo azia kon fervor.
Esta fervor no la topo mas en mi entorno , ni malorozamente en mi mizmo... eske la fasilidad de la vida prezente  amenguo muestro potensyal de entuzyazmo?
Kestyones sin repuesta komo una yamada sin grande esperansa... problemas sin solusyon, ma ke la persona no se puede detener de abordar....