Aktividades de Septembre

Karel VALANSİİran kadar Lübnan`ın içişlerine karışan bir dış güç daha var: Suriye. 1976 yılında, Riyad Antlaşması uyarınca iç savaşı denetim altında tutmak amacı ile barış gücü olarak, Lübnan`a asker yollayan Suriye, askerlerini ancak geçen sene -yoğun uluslararası baskılar sonucunda- geri çekti

Judeo-Espanyol
9 Ocak 2008 Çarşamba
Coya DELEVİ

Es enteresante, el anyo pasado, djusto en estos diyas, aviya eskrito un artikolo intitulado “Una semana de aktividad i muevas eksperyensas.” Se estava tratando del grupo de elevos de la Uiversidad Ben Gurion, sentro Moshe David Gaon. Una partida de estos mansevos aviyan partisipado a los kursos de Judeo-Espanyol, dados por el Dr. Eliezer Papo. Doz chikos grupos de estos mansevos, me aviyan demandado de ayudarles i darles informasyones sovre los uzos, tradisyones, kostumbres Sefaradis. Finalmente, aviyamos echo un lavoro enteresante.
I, oganyo, puedo dezir ke esto kaji en mizma dizpozisyon de esprito...De muevo el mez de Septembre, de muevo diversas aktividades semejantes. El mez, por si, ya es bastante yeno, intenso (yoğun), asigun mi. Antes de todo, es el trokamyento de sezon. I, estamos bivyendo la prisa (telaş) del empesijo del Otonyo, de las avyerturas de eskolas (mizmo si no tengo yo dingun dar i aver kon eskolas!). El trafiko ke no kedo de estrecharmos durante el enverano, se izo mas embrolyado (karışık)... Tanto, ke munchas vezes, estamos preferando ir a pye, a muestra destinasyon, en la mezura del posivle.
En estos dias, no me aleshi muncho de mi distrikto. Par konsekuensa, no tengo dinguna idea sovre el estado de los kaminos. Ma, por lo poko ke esto vyendo, estan en reparasyon, o “renovasyon!” (yenilenme). Una armada de lavorantes estan ancheando los trotuares, kavakando las arteras, i estrechandolas para “defender!” los otos, de azer parko en las doz vandas. De agora, sin eskaparsen los lavoros, ya esto vyendo...”Eski tas, eski hamam”(una dicha Turka, eksprimyendo ke todo esta komo antes) nada no troko!... I, ensima de esta toda polvorina, ke esta kontinuando desde Julyo, el ruido de las makinas de lavoro, de los ekskavatores... Un tablo bastante desplazyente (nahoş, sevimsiz).
Bueno... el mez de Septembre, no es solo el Otonyo, kon sus luvyas, kon sus ayres... Por siguro ke ay dias ermozos, kalmos. En vezes, el sol topa un pasaje entre las nuves, i un poko timido, mos amostra su kara para alegrarmos... Tambyen, es una partida del mez de Tishri, de fyestas, de selebrasyones, del empesijo de una mueva anyada. Keridos amigos, oy no penso mas eskrivir sovre los “Moadim”. Ya eskrivi bastante, en los numeros presedentes, seya del “Şalom”, seya de “El Amaneser.” Aki, es la okazyon de mandar mis sinseros suetos para un anyo de repozo i paz. HAG SAMEAH- SHANA TOVA.
Al lado de la ajitasyon abituala de este mez, personalmente, yo tuve otros “bulushes”,diversas aktividades. Komo lo dishe mas arriva, aktividades kaji semejantes a las del anyo pasado. En Agosto, tomi un E-Mail de Davina Breillet, nasida en Fransya de una famiya Sefaradi de Andrinopolis (Edirne). Es una muchacha de 24 anyos, dizyendo ke, komo muncha djente de su jenerasyon, sus nonos i paryentes, le ensenyaron el Ladino, o a lo menos, syertas nosyones.
Davina esta para eskapar la seksyon “Sinema Dokumental” de la Universita de Barselona. Tuvo la okazyon de meldar syertas eskritas miyas, i keryendo azer un dokumentaryo sovre el Judeo-Espanyol, su pyedrita prezumida, penso ke le podriya ayudarle. Su objektivo era de enkontrar djente, kon ken le gustariya avlar de la idioma, de su istorya, i de su evolusyon en los ultimos anyos.
En kurto, Davina vino a Estambol, i los primeros dias de Septembre, mos renkontrimos tres vezes. Avlimos, me demando preguntas. Le di syertos artikolos miyos tratando del Ladino. I, al ultimo randevu, vino kon todos sus aparatos, kamera sovre trepye, mikrofono ets... Estuvo filmandome, entremyentes ke estava tambyen enrejistrando lo ke yo avlava... Esto kontente de aver dado mi chika kontribusyon al proyekto de Davina, i le sueto reushita.
Unos kuantos diyas despues, tuve un lavoro semejante kon la Sra. Hiromi. Eya es Profesora de Linguistika (Kastelyano - Espanyol Moderno), en la Universita de Tokyo. İzo un reportaje kon mi, sovre diversos sujetos. Eya no teniya una tema espesifika. Lo importante era de gravar (ses kaydı yapmak) el dialekto, naturalmente en Judeo-Espanyol de diversas personas, kon diferentes niveles de kultura. Esto es lo ke me ekspliko eya, en adjustando ke pensava azer oyir estos enrejistramyentos a sus elevos.
Keridos lektores, no vo enyegar ke este djenero de lavoros me dyo una imensa kontentes. Siguro, i un poko de orgolyo. Es el punto flako del benadam!.. En todo kavzo tuve razon de dezir ke el mez de Septembre es bastante intenso, yeno de aktividades diversas... i lo previ!