KUENTOS I LEJENDAS

Coya DELEVİ

Komo Akiva se izo Grande Savyo...
Kalba Sabua era uno de los mas grandes senyores del derredor de Yerushalayim, i muy ospitalyero. (misafirperver) Esto le aviya valido el sovrenombre (lakap) de Kalba Sabua, ke kere dezir: “El prove entrando ambyerto komo un perro (kalba), era siguro de partir arto (sabua). Este ombre posedava grandes trupas (sürü) de kodreros, i una armada de pastores (çoban) a su servisyo. Entre eyos, un mansevo nombrado Akiva, se remarkava por su piadad, su buendad i su komporto korekto.
Paso anyos, i mizmo a la edad de kuarenta (40) anyos, era dayinda un servidor fidel de Kalba Sabua. Un diya, la ija del patron, renomada por su ermozura i sus vertudes, se aserko de Akiva, i le disho:
“Akiva, te vo azer una propozisyon (teklif). Si achetas de konsakrarte enteramente al estudyo de la TORA, esto deklarandome pronta a kazarme kon ti.”
Akiva, desde su manseves, teniya el suenyo de azerse algun diya, un grande Haham. I, agora, puede ser ke estava serka de alkansar a este dezeo. Tanto entuzyazmado de esta propozisyon, ke apenas topo fuersa de pueder avlar: “Estudyar? Es mi grande dezeo. Vinyendo a la sigunda partida de la propozisyon, yo no me syento dinyo de ti Rahel, para pueder achetar.”
“Estudya la TORA, i tu seras dinyo de kazarte mizmo kon una prensesa,” le respondyo Rahel. Desde akel diya, Akiva empeso a konoser la vertuoza Rahel, apresyo de mas, en mas sus kualidades. Los doz mansevos se espozaron en sekreto. Ma, el padre lo supo, i entro en una sanya terrivle. Kualo!? La ija regalada de Kalba Sabua, el mas riko del pais, iva tomar por marido un prove pastor!...Era inadmisivle. Malgrado la rezistensya de su padre, Rahel, kedo ferma en su rezolusyon.
Kalba Sabua, kon birra, djuro de deskonoserla komo su eredadera (mirasçı). De esta manera, Rahel iva kedar toda su vida la mujer de el mizeravle pastor, ke, digamos, ya lo aviya arrondjado i de kaza. Los mansevos se kazaron, ma deviyan topar remedyos de mantenimyento. Kuando arrivo el invyerno, eyos estavan en una kompleta mizerya. Por abrigo, lo ke posedavan era una desmazalada “kuliba”, i durmiyan ensima de las pajas. Akiva se estava sintyendo responsavle de la mizerya de su mujer. Eya le respondiya:
“No son las rikezas terrestras (dünyevi) ke me travan. Ya saves ke syempre las desdenyi (hor görmek). Es por el amor de la TORA ke te segui.” I, en unos de estos diyas, ke Rahel iva afalagando su marido, el Profeta Eliau Anavi, degizado en sedakero, se aserko de eyos i les disho:”Tened piadad de mi. Tengo una kriatura hazina i so tan prove ke no tengo afilu ni un poko de paja para echarlo.”
Akiva, de vista tomo un punyado de la paja de su lecho,(yatak) i se lo dyo al estranyero, en dizyendo a Rahel, ke aviya mas proves ke eyos. Los diyas pasando, pensaron ke deviyan bushkar una eskola, ande Akiva podriya ambezar la TORA.
“No tornes sin devenir un maestro, un savyo en Israel. Vinyendo a mi, asigurate ke el Grande Piadozo,no me va abandonar,” disho Rahel. Eya estava tan seryoza, tan sigura, ke malgrado su ezitasyon de desharla sola, Akiva acheto de partir.
Paso dodje (12) anyos, en kualos el, estudyo kon sukseso en las eskolas de Rabbi Eliezer i Rabbi Yoshua, Ben Hananiah. I, ansi, meresyo de ser klasado en el rango de los HAHAMİM, i savyos de Israel. Enfin, el momento vino de ir topar su kerida Rahel. Una noche, kon grande emosyon, arrivo delantre la puerta de sus kuliba. A su grande enkanto, oyo la boz de su mujer, i otra boz deskonosida, la de un ombre dizyendo:
“Tus paryentes teniyan razon de echarte de kaza, porke tu kijites a un ombre indinyo. El te abandono i ay dodje anyos no dyo dinguna novela.” Rahel respondyo ke era endjuntos ke aviyan dechidado ansi, eya i Akiva. Adjusto, si aviya menester, oy mizmo le konsejariya de kedar otros muevos dodje anyos, asta ke se seyga el propyo, una luz de Israel.
Akiva, sintyendo estos byervos se le lagrimeyaron los ojos, i, sin entrar, dechido de partir i retornar a sus maestros. I, de este eroismo, solo el Todo Poderozo fue testigo.A la fin de los 12 muevos anyos, Akiva alkanso a una grande nombradiya. Kuando torno a su pais, ya teniya kaji vente i kuatro mil (24) elevos de todas las partes de la rejyon. El puevlo koryo para ver el ilustro doktor. Entre esta djente, aviya una mujer de vista mizeravle. Apenas ke lo vido a Akiva, se aserko i kijo endcinoyarse (diz çökmek).Los dishiplos la kijeron arrondjarla, ma, el savyo les disho:”Deshaldad! Si semos oy, lo ke semos vos i yo, saveldo ke es a eya ke lo devemos.”
Los elevos entendyeron i se enkorvaron delantre de Rahel kon grande respekto. Kalba Sabua, vyendo esta shena, se estava sintyendo orgolyozo de posedar un tal yerno. Lo arresivyo kon todas las onores i se dezato de la djura ke aviya echo antes munchos anyos. Desho su imensa fortuna a su ija Rahel. Fue entonses ke la boda de Akiva i Rahel, se selebro kon grandes fyestas. Nunka kazamyento konosyo semejante esplendor. Se selebro tambyen, la glorya de la LEY DIVINA, a kuala todos los doz se aviyan konsakrado kon eroismo. 
                                    
Contes et Légendes d’Israel- A. Weil.
Traduksyon: Coya Delevi