Estranya manera de tomar vengansa

Marsel RUSSOBu haftaki sayımızda, Lübnan`ın kısa tarihçesini, Ortadoğu`da yer aldığı rolü inceliyoruz. İsrail - Lübnan Savaşı`nın dinamiklerini anlamak adına, Lübnan`ın ve bölgenin tarihi hakkındaki yazı dizimizi, okurların ilgi ile okuyacaklarına inanıyoruz

Judeo-Espanyol
9 Ocak 2008 Çarşamba

Klara PERAHYA

Es ke la gerra Israelo-libaneza eskapo? Ningun indisyo lo desha prezajar . La batalya se arresto... Ni desfecha, ni reel viktorya. En los korasones la amargura ke desharon todos los ke (konosidos o deskonosidos, a ke kampo ke apartengan) desparesyeron por syempre... la vizyon de una situasyon kaotika  sin grande esperansa de mejoria... un enemigo yeno de odyo ke renyega asta el derecho a la vida de su vezino i ke aspera kon pasensya la ora de chaptear... i syempre la inkonsensya de jornalistos ke transmeten informasyones yerradas i fotografias falsifikadas... 
En la opinyon  internasyonal en jeneral (salvo unas kuantas bozes ke analizan el problema sin trasbokarlo) el mizmo oportunizmo, sin kerer entender  ke dia despues de dia el perikolo suve, no solo kontra los djudyos ma kontra  lo ke sinyifika reelmente la sivilizasyon oksidental, sus prinsipyos demokratikos ,sus preseptos de  respekto mutual,  todo lo ke oy  yamamos las valores de baza de la egzistensya...
Por demazia, en un pais ke figura entre los  mas poderozos de la rejyon, aparejada por el governo el mizmo,una ekspozisyon de karikaturas ke profanan la memorya  de los 6 milyones de martiryos eksterminados salvajamente en la Shoah..
Ke es la razon de una semejante ekspozisyon en un payis profundamente relijyozo, fuerte kon su pasado gloryozo i aktualmente su poder militar? Vengansa kontra las karikaturas publikadas ay de esto unos kuantos mezes en el Danemarka?
El puevlo Judyo no tuvo ninguna partisipasyon markante en el kavzo de las karikaturas del Profeta Mohamed. Al kontraryo munchas deklarasyones fueron echas de la parte de nombrozos kapos de komunidades Judias kondenando el blasfemo kontra las valores de baza de kualkyer relijyon
Mozotros mizmo en esta pajina, aviamos eskrito tektuelmente lo sigiente:
“Una karikatura es kaji syempre satirika i una satira es una burla ke tyene komo eskopo de ridikularizar la persona o el grupo de personas a las kualas eya se refera... i ninguno tyene el derecho de umilyar sin razon un puevlo en sus kreensas espirituales. El laisizmo no es un refuzo sistematiko de la relijyozidad ma la simple espartisyon entre  “lo relijyozo” i “los echos publikos”... lo ke justamente permete la toleransya i el respekto enverso todo modo de konviksyon”
Ma, syempre el mizmo odyo enverso muestro puevlo, un aborresimyento ke vyene del fondo de la antikuidad. En las grandes potensyas, la  mizma sed de hejemonia i la mizma  persistensya a kerer reduzir los otros a sus solas kreensas asta refuzar  la realidad istorika en favor de un negasyonizmo  kaji igual en gravidad al krimen el mizmo.
Profanasyon de la memorya kuando ainda estan en vida sovrebivyentes judyos i  non judyos, kuando en los rejistros internasyonales egzisten provas irrefutavles?. 
Konsernando esta ekspozisyon de kariklaturas de la Shoas, Bertrand Delanoë, Governador de Paris, mando al embashador Iranyano en Fransa, una letra en este senso:
<No se puede dezir nada, salvo kondenar esta inisyativa ke tyene komo eskopo de burlarse de la trajedia de la Shoah i  banalizar la mueva ola de antisemitizmo en tomando komo instrumento “la Libertad de ekspresyon” . I esto, en un momento ande la violensa i la gerra egzijen ke kada uno  favorize la voluntad de dialogo, de pasifikasyon i de toleransa. 
Al nombre de las valores de umanizmo i de dinyidad de las kualas el Iran es uno de las fuentes istorikas, vos demando de intervenir serka de las otoridades de vuestro payis , afin de topar el kamino de “la Razon” i del “Respekto del Otro”.> (fin de sitasyon)
Toda muestra gratitud a Bertrand Delanoë. En efekto, en vertud de ke prinsipyo de moralidad, se kastiga inosentes? Sovre baza de ke komandamyento selesto se puede renyegar la verdad i profanar la sakralidad del derecho a la vida?"