La ventana de vuestra ermana

Şeli GAONLa kontinuasyon del viaje de Karadeniz...

Judeo-Espanyol
9 Ocak 2008 Çarşamba
El treser dia fue un dia muy kanseryozo, ma tambien un dia muy fruktuozo. Demanyana a las syete i medya salimos al kamino para ayegar a Hopa ke es un kazal de Artvin, izimos tres oras de kamino; en gozandomolos del bodre de mar ke estava ornada en kada sinko metros de rompeolas (dalgakıran) porke la mar de Karadeniz es rebolteada (dalgalı).
Esta rejyon tanto abondante; ke mizmo enriva de las rompeolas aviya arvoles vedres en medyo la mar.
Hopa; un lugar moderno, kon las personas ospitalyeras, ma no ay koza enteresante de ver mas ke los terrenos ensembrados de çay; i los kazalinos arekojyendo el çay para embiyarlo a las fabrikas.
Oras de midi mos yevaron a un restorante tipiko de Borçka ke ez otro kazal de Artvin. Pasimos de un ponte i mos resivyeron kon muncha ahadu en ofriendomos las kozas espesyales de esta rejyon.
Despues ke ya se komyo i bevyo; otras dos oras para arivar a un lugar maraviyozo;Karagöl.
Komo se puede entender del nombre un lago bastante grande; entornado de algas; en medyo del lago una penya (kaya) grande, kon un arvole en medyo.
İzimos el torno del lago en dos oras; entre las aguas, las algas, los montones de arvoles; renkontrando turistos, avlando kon eyos. En este kamino kanseryozo, aviya ; arvoles, vedruras, i la luvya ke mos estava forsando a kaminar kon muncha atansyon para no kayer, tanto estavamos mirando delantre de mozos; ke no estavamos puedyendo mirar al panorama enfrente de mozotros.
A la fin del torno travimos fotografias, bevimos çay i tomimos kamino para Ayder ande se topava el otel.Despues de kuatro oras, arivimos bolados de kanserya ma, satisfesados del dia.
Myerkoles demanyana vijitimos las rezidensyas de 100끞 anyos de Çamlıhemşin; lugar alavado de Rize.
Estos edifisyos konstruisados entre las montanyas; ande se puede iyir solamente kaminando. Delantre de  kada rezidensya aviya un Serender, ke kere dizir; un ambar konstruisado enriva de kuatro pilares (direk) ande se esta guadrando en invyerno; las tiras (mısır), las avyanas, el aroz i todo modo de kozas, porke es en una altura ke los ratones no pueden suvir.
La forma muy enteresante.
A la torna para repozarmos mos fuimos a los banyos termales, mos  lavimos kon aguas muy kayentes de 45 grados.
Dizen ke estas aguas dan sanedad a las personas, i vyene bueno a todo modo de dolores. Mos dicheron de bever esta agua; i para ver provecho kale kurarse una semana a lo menos.
El sinken dia temprano una ora de kamino, suvimos fina 2000 metros a Zilkale; una vista maraviyoza; la tonalidad de la kolor vedre; de las montanyas, arvoles i şaras (orman); i la kolor blu de los syelos, de las nuves, de las aguas; i abachimos al plato Polovit ande izimos un torno de dos oras entre los kanyos (balçık), şaras, kaskadas (şelale) i entre este peizaje aviya una vejetasyon (bitki örtüsü) ekstraordinarya; puedeser milles de plantas, flores,piedras....
Ez  un sentimyento diferente de ver esta natura maraviyoza, travimos fotografias i izimos un piknik kon un ogar (mangal) ande asimos keftikas (köfte) en la lumbre, komimos kon ambyertura; el tyempo muy favorable, kantimos, baylimos.
A la torna mos fuimos a los banyos termales i despues de komer mos fuimos a baylar Horon.
Horon es un bayle karakteristiko de esta rejyon, es komo Hora; ombres kon mujeres, mano kon mano en cuntos; las mujeres tapadas las kavesas kon unas eşarpas brodadas ke se atan de una forma diferente; i un kantador en medyo de todos.
Pasimos una nochada enteresante, aviya turistos, jurnalistos almanes, amerikanos ke estavan fotografiando los bayles de las personas; enkantados i kontentes.
La intimidad i la unyon entre las personas del grupo, el giador (rehber) i la famiya ke era patrona del otel era  koza de ver.
Kontentes i satisfesados del dia, tornimos entre la bruma i las nuves al otel a medya noche para echarmos i durmirmos...
a kontinuar...