Malgrado los evenemyentos turmelozoz i trajikos ke tomaron lugar mizmo diya en el Galil i Hayfa,se reunyeron kaji 80 Kuzgucuklus de Akko, Kiryat Ata i Hayfa en el norte asta Bat Yam i Yerushalayim en el sentro del payis. A la reunyon arrivaron espesyalmyente Aron Hara i Vitali Pinto de Kuzguncuk i Çetin Gabay i su mujer de Geneva.
En una kose del salon se organizo un sergi de fotos de famiyas de Kuzguncuk.
Kada uno ke entrava al salon se renkontrava kon vizinos i amigos vyejos, abrasandosen i bezandosen del eskarinyo. Te akodras? Era el byervo el maz auzado en este renkontro.
En un kroki de Kuzguncuk mandado por el muhtar de la mahalle, kada uno de los partisipantes apuntaron la kaza i el adreso de la kaza ke moravan. Los nombres de famiya fueron apuntadas kon una alfinete enriva este plano. Kada uno se anombro de los vizinos Judyos, Gregos, Turkos i Ermenis ke teniyan serka de sus kazas.
Los partisipantes trusheron fotos vyejas de Kuzguncuk la mahalle de memorya kollektiva de estos Judyos.
La reunyon fue organizado i dirijado por David Angel, el mizmo desendyente, nassido i engrandesido en Kuzguncuk. El presento la idea de esta reunyon i ekspliko la kronolojiya del aresamyento de los djudyos en Kuzguncuk. El avriyo el renkontro kon un minuto de silensyo para komemorar las kazultades ke muryeron diya el mizmo en Hayfa i el Galil.
Los respektados musafires de Estambol Aron Hara i Vitali Pinto meldaron un mesaje del Presidente de la Kehila de Kuzguncuk Beto Adato i prezentaron al Prezidente de la Sosyetad de Turkinos en Israel Momo Uzsinay un plato de seramik ornado kon los Dyez Komendamyentos.
Vitali Pinto en su kurto deskorso konto ke de las 800 famiyas djudiyas ke biviyan en Kuzguncuk kon la formasyon de la Republika Turka, kedaron oy solo 8 famiyas. Malgrado esto los Kuzguncuklus arivan en Sabbat i Mued al Kal de Kuzgucuk.
Akorde a los livros de istorya los Judyos empesaron a bivir en este foburgo de Estambol desde el tyempo de los Byzantinos, en esta epoka el foburgo era konosido komo Bella Vista.
En el 17'en syeklo los Judyos eran la mas grande komunidad de este sito.
Kuzguncuk era renomada por su semiteryo i era gran zahud de ser enterrado en Kuzguncuk syendo en la mizma teritorya kontinental, la Asya, kon Yerushalayim. Las primeras tombas de este semiteryo deriven del 14'en syeklo.
Los Gregos i los Ermenis juntos kon los Turkos arivaron a este lugar mas tarde.
Nitzav David Tzur el Komandante de la Polisiya del Sentro de Israel i Tel Aviv, nasido en Kuzguncuk, ijo de Fortune (Maden) i Sami Cur, onoro la reunyon kon su prezensya djunto kon Leon su ermano.
El konto ke vino a Israel de 6 anyos, i ke era el komandante de la Jandarmeriya Israelyana, ke fondyo la unitad de lucar el terorizmo en Israel i ke fue a esta kapasitad envitado a vijitar la Turkiya antes tres anyos. El konto su vijita anonima a Kuzguncuk - la mahalle de su nasimyento. Su prezensya a este renkontro dyo muncho orgolyo i satisfaksyon a los Kuzguncuklus.
Malgrado la sita de Kuzguncuk komo un foburgo non emportante de Estambol, salyeron de esta komunitad, doktores, entelektueles i rabinos. La primera eskola Aliansa en Estambol se avriyo en Kuzguncuk en los anyos 1875.
La Dr. Amy Mills ke fue una de las kavzantes a organizar este renkontro es una envestigadera de la Universitad de South Carolina en los Estados Unidos i ensenya en el departamyento de geografiya. Eya es eksperta de identifiyar un sito geografiko meso la memorya kolektiv de los ke biviyan en akel foburgo. Dr. Mills ekspliko las razones de su envestigasyon akademika sovre Kuzguncuk. Eya se adreso a la odiensya en Turko i konto ke Kuzguncuk es un egzemplo uniko de toleransa de kulturas i de relijyones diferentes en un payis muzulmano komo la Turkiya. Kuzguncuk era una sosyetad pluralista ande las minoritades eran entegradas en el korason de la vida de la Turkiya.
Amy prezento en el ekran fotos de la kayes, de kazas i vistas de Kuzguncuk ke fue reaksyonda kon grande emosyon. "Aki era mi kaza!" , "Este era mi bakkal !" , "na esta fuente estava serka de mi kaza !" etc eksplika la reaksyon de los prezentes.
Duspuez avlaron Dr. Robert Karmona, Tuna Debensason, ke bivyo en Kuzguncuk asta 17 anyos, i otros partisipantes sus memoryas personales de Kuzguncuk.
Personajes komo Ribi Amram, Ribi Michel Abut, Pepo Karakashon, Dr. Robert Karmona, Gabay el Farmasisto djuntos kon las figuras pintadas de ordinaryos personajes komo Baruh el Bekci, Mordo el Balikci, Sidi el kasap, Marko el bakkal, enfuertesen la memorya kolektiv de esta komunitad djudiya. Las memoryas de todos prezentes se aunaron a l onor ke fue dada a Amigo (Hezkiya) el burlador, el diya ke muryo, por todos los sivdadinos de Kuzguncuk.
Vitali Pinto tambyen presento un filmo editado por la Komunitad de Kuzgucuk sovre la istorya de la kehila judiya i los Kales de Verane i el Kal De Abasho, ke eran sentros sosyales i relijyones de la kehila djudiya de Kuzguncuk.
"La agua en Kuzguncuk era buena i kada kaza teniya su pozo" konkluo Vitali su prezentasyon. El se akodro una vyeja dicha de Kuzguncuk. "Ev alma komsu al" "No merkej kaza, bushka vizino bueno".
Unos de los puntos de emosyon en este renkontro fue la prezentasyon de una torta prezentada kon surpriz a Viki Angel Direktora de La Sohnut, el diya de su nasimyento.
Los Kuzgucuklus ke se toparon en esta reunyon eran de las famiyas renomadas komo: Kastoryano, Amon. Azuz, Albala, Ellevi, Meir, Boton, Boveta, Belifante, Fresko, Arditi, Ancel, Razon, Salerno, Adato, Mizrahi, Akivoti, Bali, Karmona, Rodrig, Natan, Gabay, Maden, Yerushalmi, Cur, Eskenazi, Suryano, Nahmias, Levent, Levi, Sevi, Saranga, Ben Levi, Benveniste, Seneor etc.
La reunyon se termino kon el kante "Mizmor Le David" al uzo de los djudyos e Kuzguncuk.
La nochada se serro kon la kanta de la himna Israelyana " Hatikvah".
