Klara PERAHYADe muevo el Oriente-Medyo en las flamas i el apreto, de muevo la inimistad, el odyo i la rankor.
En Irak, karnajes orrivles i insesantes ...vyejos, mujeres ninyos sin defensya matados al nombre de un ideal ke no topara nunka su justifikasyon
En Israel-Palestina , de una parte: mansevikos arrevatados, el uno salvajemente matado, el otro ferido i puede ser en reziko de ser eksterminado a su torno, lo ke a todo modo de presyo kere evitar el Prezidente Ehud Olmert... de muevo el espanto, la angusya i la prekaridad komo vizyon del futuro....
De la otra vanda, un puevlo enserrado en una parsela de tyerra muy chika para el volum de sus abitantes, sin luz, mizmo sin kuras, un puevlo kansado de sufrir, sin nada azer de pozitivo para salir de su mizerya, sostenido en su lucha loka kontra "el otro" por la sola intensidad de un aborresimyento sin fin enverso su vezino..
Dos puevlos viktimas de un destino implakavle ke solo eyos pedran venser... no kon las armas, no kon la enimistad, ma kon un esforso de komprensyon mutual. Saver tender la mano sin por esto abokar la kavesa... no someterse nunka sin razon, ma tambyen no someter nunka kualsekyer a si mizmo... la umilyasyon desha en la boka un pasto de seniza muy difisil a soportar.
Simultaneamente, en varios lugares del universo, la fyevre del "Mundyal", el loko enfohamyento por un evenemento sportivo ke en otros tyempos puedria guadrar su dimensyon verdadera... Es un fakto ke desde mas de medyo siglo, el balon majiko tomo en la vida de kaji todos los puevlos (no solo en el kampo sosyal ma tambyen kultural) una importansa a syertos momentos preponderante, asta devenir el barometro de sus moral i estado de alma..
La semana pasada la Fransya embabukada en sus multiples problemas sosyo-ekonomikos, paresia undida en el pesimizmo... la viktorya de su ekipo de football sovre los Espanyoles i despues sovre los Brezilyanos abasto a meterla en estado de euforia...
Ke es la razon de este enfoho? "Bushkida de divertimyento" o byen "Menester de salir de su propyo marazmo para mesklarse a los otros en un mizmo entuzyasmo"?
El espektakolo de una partida de spor komo de una pyesa de teatro o de un filmo de sinema es mas ke un pasatyempo , el es un rekreo en su dople sinyifikasyon: 1) interrupsyon del lavoro en vista de deskansar 2) aksyon de "re- krearse" krearse de muevo.
Partikularmente en el dor aktual, lo ke la persona bushka en la vizyon de una partida de football es probavlemente (en desparte de su interes por la taktika del jugo) esta emosyon ke prokura todo modo de kompetisyon en la kuala el espektador se investise el mizmo. Alora el espektakolo devyene no solo un simple pasatyempo, ma una partisipasyon mental a la performansa.
No amenguaremos la importansa del divertimyento en muestra vida, sovre todo en la situasyon prezente, el sostyene muestro ekilibro moral komo intelektual i mos ayuda a mijor asumir muestra egzistensya.
