Es un poko esto ke fue komemorado martes la noche el 6 del mez de junyo, en el grande anfiteatro de la "Bilgi Universitesi" ande Espanyoles iberikos, Israelyanos i Judyos de muestra komunidad se rekojeron para fyestrar el venten aniversaryo del establesimyento de las relasyones diplomatikas entre İsrael i la Espanya, i selebrar endjuntos, de igual a igual, la paz i la konkordya.
La sinyifikasyon de esta nochada era grande en esta sala de universidad (eya mizma simbolo de luz i de libertad de pensamyento) ande ombres i mujeres de diferentes kulturas, diferentes kreensas i diferentes maneras de pensar, se toparon reunidos en la mizma emosyon.
En la asistensya diversas personalidades de la diplomasia Iberika, konsolos i reprezentantes diplomatikos de diversos payizes, partikularmente de los payizes Ispanikos, personalidades de muestro payis ansi ke dirijentes i notavles de muestra komunidad...
5 Personas tomaron la palavra, ke me permeto de sitar por orden de intervensyon:
Diskorso de "byen venida" de Pablo Martin Asuero direktor del İnstituto Cervantes de Estambol, grande arkitekto de la mueva estruktura de las relasyonyes kulturales entre los desendyentes del Imperyo Iberiko i los ijos leshanos de los ke fueron ekspulsados...
Kon su entuzyasmo, su lavoro sin interrupsyon i su simplisidad, Pablo Asuero supo krear una atmosfera de franka amistad entre la kolektividad sefardi i el Sentro ke el dirije.
Diskorso de Raimundo Ezquerra Konsul Jeneral de Espanya en Turkia, personalidad muy apresyada en muestra komunidad kon la kuala el supo estableser un kontakto kordial ke servira syempre de baza a uns larga i fuerte amistad.
Despues de aver ekspresado su profunda kontentes de toparse delantre una semejante asistensya i su alegria de fyestar todos endjuntos el aniversaryo del establesimyento de las relasyonas diplomatikas entre la Espanya i Israel, el Sinyor Raimundo Ezquerra mos dyo muy klaramente las razones del grande retardo de su Payis a rekonoser ofisyalmente la egzistensya del Estado Judyo. El fakto es ke a la fin del rejim diktatoryal de Franko, la Espanya se topava en un estado de marazmo (kriza) ekonomika muy grande i uno de sus raros kampos de aktividad era las relasyones komersyales kon los payizes arabos ke (por motivos imperyozos i kaji vitales) no devia dunke a ningun presyo deskontentar.
Mordehai Amihai Konsul Jeneral de Israel en Turkia, afirmo tambyen, a su torno, la profunda amistad ke su payis resyente por el puevlo Iberiko. El formulo kon fuersa i de una manera direkta ansi ke es de uzo en el payis ke el reprezenta, la importansa de las relasyones Israelo-Iberikas i la valor de una kolavorasyon en varios kampos de aktividades Mordehai Amihai mos disho tambyen ke el personalmente se topo prezente en el establesimyento de las dichas relasyones i mos konto sus eksperyensas personales.
A un syerto momento, el paso la palavra a Jak Kamhi Prezidente de la Association del Kuinsentenaryo "500 yıl vakfı", el kual (despues de aver afirmado su profonda gratitud enverso el maraviyozo esprito de ospitalidad del Imperyo Otomano) mos konto a su torno, sus reminisensyas personales... En la epoka ande la Espanya estava en estado de negosyasyon kon el Konsilyo Evropeo, la Turkia avia demandado la otorizasyon de asistir a syertas entrevistas, lo ke le fue por seguro akordado, otorizasyon ke permetyo a myembros del "Iktisadi Kalkınma Vakfı" (Fundasyon para el Desvelopamyento Ekonomiko, de lakuala Jak Kamhi era el prezidente) de asistir a diversas seanses.
El siklo de konferensyas fue kloturado por la de Abraham Haim, afamado istoryano Israelyano, el kual mos avlo prinsipalmente de Angel Pulido, Ombre de Estado Espanyol ke izo konoser los Sefaradim "Espanyoles sin patria" a su payis... El mos relato en mizmo tyempo las sirkunstansyas del enkontro de Pulido kon el Profesor Bejerano, el kual mas tadre iva ser nominado “teniente Gran Rabbino” de Turkia .
Abraham Haim mos konto igualmente kel premyo "CONCORDIA" (ekivalente Espanyol del premyo Nobel de la paz) emanasyon de la fundasyon ASTURİA enkavesada por el Prens Philipe, fue atribuido en el anyo 1990 a todas la Komunidades Sefardies del mundo... Una delegasyon de 12 personalidades Judeo-Espanyoles de diversos payizes asistyo a la seremonia debasho la prezidensya del Haham Salomon Gaon ansi ke de Nesim Gaon prezidente del World Sephardi Federation. Entre los prezentes, se topavan tambyen el orator Abraham Haim i muestro amigo Naim Güleryüz.
En esta mizma seremonia el Haham Gaon meldo una poezia tanto esmovyente ke el prens Philipe no avia pudido asperar la fin para aplodisar... Byen entendido este jesto era ahuera del protokolo ma venia del fondo del korason.
Esta ermoza nochada tomo fin kon el konserto de los Pasharos Sefaradis, romansas (entre laskualas munchas de la epoka medyeval Espanyola) fueron kantadas por Karen Gerson Şarhon i Izzet Bana, bozes ke syempre mos entuzyazman, la una vibrante de emosyon, la otra profundamente grave, ma el momento kulminante de la reprezentasyon fue los dos koros, el uno kompuesto de las "Estreyikas d’Estambol" dirijido por İzzet Bana, el otro de "los estudiantes del kurso de Judeo-Espanyol ke Karen Şarhon da en el Instituto Cervantes"... Estas dos performansas de elevos tyenen, a mi pareser, un karakter simboliko, verdadero indisyo de un paso echo verso el avenir, paso por seguro ainda problematiko ma ande ya se persive komo un chiko rayo de esperansa.
