La Konsensya Profesyonal

Dora NİYEGOLos historianos se enteresaron lo mas en el estado ekonomiko de los djudios de la Espanya Kirstiana de la Edad Media ke empeso en el onzen siglo i se termino al kinzen. En las relasiones komersiales, los djudios i los kristianos se pasavan muy bueno akeyos anyos. Ma en el estado sosial, no aviya dinguna relasion personal entre eyos pormodo de las limitasyones relijiozas de la Eglisia i de la Sinagoga. El komporto agresivo de la Eglisia forso la Sinagoga a

Judeo-Espanyol
9 Ocak 2008 Çarşamba

Coya DELEVİ

Antes unos kuantos mezes, en esta kolona, aviya eskrito un artikolo sovre "DOS KAVZOS SEMEJANTES." Se tratava de una manseva i un mansevo, en bushkida de un empyego. Ma, no tenyendo formasyon profesyonal, ni alguna espesyalizasyon, naturalmente teniyan difikultad para topar un echo. Solamente, los mansevos, no podiyan konsevir (idrak etmek) i achetar este estado. Porke, eyos estavan pretendyendo ke pueden azer "Lo ke kere ke seya! N’importa kualo!) Aki, no penso repetar el artikolo, ke aviya terminado kon una dicha de Lord Chesterfield: "TODO LO KE SE DEVE AZER, MERESE DE SER BYEN ECHO."
En estos diyas, tuve en kaza lavorantes. Fui testigo de syertos de sus komportos. No tengo entisyon ni de malsinarlos (şikayet etmek, kötülemek) ni de alavarlos. Solamente, komo lo ago kaji syempre, syertas kozas me izyeron pensar, i dechidi de analizar de una manera objektiva, la kestyon o mas egzaktamente, la nosyon de la konsensya profesyonal. Oy vamos avlar un poko de esta nosyon, ke asegun mi es absolutamente nesesarya.
En realidad, no se puede afilu konsevir su absensya, siguro en prensipyo!!..Asegun mi, es una forma, un sinyo de respekto verso la profesyon i tambyen, la persona eya propya. Malorozamente, se esta azyendo rala de diya en diya. Esperaremos ke no va despareser...
La djente estan en una gerra kontinual kontra las difikultas de la vida. En ovligo, para pueder arremedyarsen, de vez en kuando, se estan olvidando el dover de kumplir sus profesyones kon atansyon. Aki, no kero emplear un byervo pezgado. Munchas personas estan vyendo solo el profito materyal, la renta (rant) ke les puede prokurar sus karyeras o lavoros. Esto es muy normal, i en un senso sus derecho (hak), esto d’akordo.
Ma, tambyen, no se deve olvidar la misyon ke tyene kada profesyon. Seya ke se trate de un artisto, artizano o doktor, toda profesyon o karyera, komporta una misyon. La persona tenyendo un ideal, deve esforsarse a realizarlo lo mijor posivle. Aki no kero anchearme sovre kavzos partikulares. Kreo ke el lektor ya tyene su idea i su komento, komo yo tengo mi propya opinyon, sovre el sujeto.…
Esto admetyendo ke las kondisyones aktualas de vida, pueden eksplikar en una mezura syertos komportos. Por egzempyo, perkurar a eskapar lo mas presto posivle un lavoro, para pueder ganar mas muncho, se puede achetar. Ma, ke se aga manko o malo, NO!!. Estamos bivyendo en una epoka difisil, es verdad. El pan esta en la boka del leon, i munchos mansevos sin echo. Los ke toparon un lavoro, deven konsiderarsen mazalozos. Deven tambyen apresyar esta shans i byen emplearla.
Analizaremos un poko, otros  aspektos, empesando kon preguntas. Una persona deve o no limitarse a azer estriktamente lo ke se le demanda? O puede mostrar un poko de kreatividad, (yaratıcılık) de inisyativa? Todo depende… Si el patron remarko ke tyene enfrente, un elemento kreativo, le puede deshar la inisyativa. Mas i mas si se izo una opinyon pozitiva sovre su empyegado. El djesto del patron es un sinyo de estima. (takdir)
I, otra demanda: si un kolego, izo una falta, (hata) se deve o no, sinyalarse al patron? Asegun mi, no es muy djusto, ni etik, el djesto de sinyalar, en syertos kavzos. Aki se puede avlar de malsinut, i mizmo de selo, no se… Yo penso ke el lavorante ke remarko la falta, en primero deve provar de ayudar, de remedyar. (çare bulmak) Lo deve azer sin avertir los superyores. Siguro al menester, en un kavzo importante, es muy natural de informar los dirijentes o superyores.
Yo kreo ke uno ke eskojyo libramente su profesyon, es atado a eya. Del momento ke tomo la responsabilidad, es konsiente ke el lavoro deve ser kumplido "KOMO SE DEVE." Porke todas las karyeras o profesyones egzijan la "KONSENSYA PROFESYONAL." Kero eskapar este artikolo, kon unos kuantos versos miyos…

ESPERANSAS I REGRETOS
Syempre tuve esta kreensa,
Ke nase kada persona,
Kon una misyon,
Alguna vokasyon…
Ken doktor, ken arkitekto,
Ken artisto, ken avokato.
Kada uno siguro empesa,
Kon muncha esperansa,
Ay iluzyones, ay proyektos,
I, malorozamente, ay regretos…

C.D.