Novelas... Novelas...

David OJALVOLudwig Wittgenstein, tartışmasız çağımızın en büyük filozoflarından biridir. Bu hafta başlayan yazı dizimizle birlikte, Wittgenstein`ın hayatını ve genel hatlarıyla çalışmalarını sunacağız. Sizi bir dâhinin yaşamını yakından izlemeye davet ederken, Ludwig Wittgenstein hakkındaki diziyi ilgiyle okuyacağını

Judeo-Espanyol
9 Ocak 2008 Çarşamba

Rezultado del primer kurso de Ladino debasho la direksyon de Dora Niyego

El primer kurso de Ladino kompuesto de 30 oras de un lavoro regolar i asiduo dirijido por muestra kolavoradora Dora Niyego  en el "Instituto Cervantes", vyene de tomar fin kon grande sukseso.

Este korso avia empesado el 13 del mez de Marso al nivel elementaryo. Las estudyantes eran, por la mas parte,  prinsipyantes sin ninguna konosensya reel de la lingua, salvo lo poko de Judeo-Espanyol ke avian oido en sus chikes. Aktualmente eyas estan en estado de pueder darsen a entender.

Konsakrado ekskluzivamente al lenguaje verbal, este korso era kompuesto de "lektura de tekstos", de "ensenyansa de vokabularyo" i sovre todo de "dialogos entre los elevos".

La mas parte de las partisipantes son  madres de chikos ninyos, aedadas eyas mizmas de manko de 35 anyos. Mos azemos un plazer de sitar sus nombres: Oro Kohen, Lina Alev, Selda Seneor, Bahar Anahmias, Rakel Bahar i Selin Borgel Sisa.

Este grupo ke lavoro kon grande ardor dezea por seguro kontinuar el estudyo al nivel del segundo kurso. I muestro dezeo es de ver este interes enverso muestra lingua etnika pujar de dia en dia afin ke no despareska enteramente el patrimonyo kultural de muestros avuelos.

 

Grande aktividad kultural en Paris en el kampo Sefardi

Syempre aktivo i dinamiko, syempre en perpetual desvelopamyento, el Komite Sentral de la Asosyasyon Sefardi Franseza "AKİ ESTAMOS" mos mando el programa del segundo Festival de "Kulturas Judias - Mozaika Sefardi" ke tendra lugar en diversas salas de konferensya de la kapital Franseza, desde Juevez el 15 asta Alhad el 25 del mez de Junyo.

Grande varyedad de sujetos konsernando el Sefardizmo i tambyen el Yıddish... Entre los diferentes konferansyeres , munchos mos son byen konosidos, amigos sinseros de muestra komunidad i ke munchas vezes fueron para mozotros verdaderos giadores, komo:  Hayim Vidal Sephiha, Jean Carasso, Marie Christine Varol-Bornes, Mireille Mazoyer-Saul, Michael Halevy, Lionel Levy, Rosie Pinhas, Brigitte Peskin ets...

Un grande lugar fue rezervado a la Fyesta de Djoha  "Djoha est passé par la , il repassera par ici" (Djoha paso por aya, el va de muevo pasar por aki) tema immortal de la literatura folklorika kaji mundyal i tambyen de la muestra.

Reushita buena a muestros amigos Fransezes en todas sus aktividades i todos sus proyektos.