Un diya de Primavera

Klara PERAHYAMyerkoles la tadre el 24 del mez de Mayo, en la kayente in tan konvivyal atmosfera del Instituto Cervantes, su direktor el Dr. Pablo Martinez Asuero organizo una "konferensya-egzibisyon" konsakrada unikamente a timbres postales Sefardis , konferensya partikularmente interesante por su sujeto, su kontenido i en mizmo tyempo la metikulozidad i el amor kon los kualos eya fue aparejada i prezentada por el koleksyonador Mordehay Ar

Judeo-Espanyol
9 Ocak 2008 Çarşamba

Coya DELEVİ

Puede ser ke kedi un poko tadre de eskrivir por la Primavera, ma, dayinda la estamos bivyendo yena, yena. Oy, el 21 de Mayo... Afuera ay un tyempo maraviyozo, un sol briyando, un sielo klaro. Oganyo, tuve la impresyon ke la mueva sezon vino mas demprano. En los diyas de fin Marso, afilu ya aviya un tyempo ermozo. Para mi, el sinyo konkreto de la Primavera, kada anyo, son los arvoles delantre de las ventanas de mi kaza. Ay muncho tyempo ke ampesaron a vestirsen de una parur vedre, de ojas mas abundantes, komo un mirakolo.
Los bulvares, los kaminos prinsipal por ande esto pasando, los parkos, estan tal una sinfoniya de flores, de kolores, a kolores...Otruna koza, ke no tenemos visto asta oganyo, fue el festival de tulipas (lale), eyas tambyen multikolor. Uno de los esloganos de la Munisipalita, era: "Estambol, se esta topando kon sus tulipas, tres milyones de tulipas estan avyendo en el mizmo momento." Ansi tengo razon! de pretender ke la Primavera vino kon una savor diferente!! Me parese ke ivan desraizar (kökünden sökmek) las "sevoyas" de las tulipas, para pueder konservarlas...
Devo admeter ke despues de los ermozos diyas de Avril, arrefresko un poko, i afilu mos keshimos de yelarmos. Oy no se si es del aver, no kero eskrivir nada de seryozo o negativo. Demanyana, tomimos el vaporiko de BEBEK, izimos un tur fin Emirgan, pasando por Kanlıca ets..i, sin abashar tornimos a Bebek, despues de azer el "ring". En el parko, kedi un momento a  kontemplar las kriaturas djugando i los bebes en las pusetas... todos luzyoz, todos savrozos!...En kaza, dayinda esto kon la vizyon inkomparavle del torno de mar i de las kriaturas, i otros detalyos chikos, inosentes, ma, influentes sovre la umor de la persona.
Para pueder deskuvrir los mil detalyos agradavles de la vida, kale ser dezeozos de bushkarlos. Son kozikas chikas ke mos alegran, mos dan kontentes i mizmo felisidad. No se  si lo tengo eskrito mas antes, ma no sale danyo de repetar mi filozofiya de vida: "Por ampesar, devemos admeter ke, no solo las trandafilas (gül) tyenen punchones, ma, ke tambyen, i LOS PUNCHONES TYENEN TRANDAFİLAS! Esto es una manera de pensar kon optimismo i no ver solo la facha negativa de las kozas i evenimyentos.
No se komo va estar el tyempo kuando el lektor va meldar este teksto. Sielo eskuro?, fresko?, o azyendo luvya? Ke importa?...Ansi ke ansi, Junyo esta detras de la puerta i la ermoza fyesta de SHAVUOT, tambyen.
Ya se, otrun poko, vamos avrir la T.V, tomar las novelas, i puede ser la majiya del diya va despareser. Ma, yo no kero ni pensar ansi. Penas, ansyas, tristeza i melankoliya no estan lavorando oy, estan en konje de fin de semana!!!NIETZCHE tyene una palavra, ke puedo tresladar komo: "El umano tenyendo tanta pena, ansya i amargura, fue ovligado de deskuvrir o krear la alegriya i la riza por kompensar."
La vida es un regalo maraviyozo, i los ke estan konsientes de esto, la biven komo disho el Sr. SHIMON PERES "Mirad kon esperansa al avenir, i kon anistad, a vuestra syedra i derecha." 

FYESTA DE LECHE I MIEL

En medyo de los dezyertos,
En el MONTE de SINAY,
Los Dyes Komandamyentos,
Mos arregalo AD...

Oy en diya, el mundo sivilizado,
Se va demandando, komo?,
Muestra profeta, MOSHE RABENO,
Pudo ofreser al Djudaismo,
Kodes de sivilizasyon maraviyozos,
En medyo d’un mundo primitivo,
Antes mas de tres mil anyos...

Un kante a la gloria de DYO,
Ke MOSHE RABENU arresivyo,
La fyesta de leche i miel: SHAVUOT,
Grande tambyen,  komo Pessah i Sukkot...