Muy interesante egzibisyon-konferensya de timbres Sefardis prezentada por Mordehay Arbell en el I

Klara PERAHYAMyerkoles la tadre el 24 del mez de Mayo, en la kayente in tan konvivyal atmosfera del Instituto Cervantes, su direktor el Dr. Pablo Martinez Asuero organizo una "konferensya-egzibisyon" konsakrada unikamente a timbres postales Sefardis , konferensya partikularmente interesante por su sujeto, su kontenido i en mizmo tyempo la metikulozidad i el amor kon los kualos eya fue aparejada i prezentada por el koleksyonador Mordehay Ar

Judeo-Espanyol
9 Ocak 2008 Çarşamba
Komo el mizmo lo dize en una chika eskrita ke tuvo la djentileza de remeterme, "La coleccion de sellos postales(posta pulu) es conocida como una aficion (sevgi, şefkat) entretenida ,qué ademas contribuye a enriquecer nuestros conocimientos en el campo de la historia, la geografia, la ciencia y el arte. El estudio de los sellos postales sobre los judios sefardies permite introducimos en un mundo sumamente rico y variado i a veces desconocido de la Diaspora" (fin de sitasyon).
En repuesta al  Dr. Musa Albukrek (igualmente grande koleksyonador de sellos postales) ke le demando komo tuvo la idea de eskojer un semejante sujeto, el konferansyer disho  ke en el korso de su karera de Embashador, el avia realizado el estado de dispersyon de los Judyos Sefardis, esparsidos en diferentes partes del mundo, sin munchas vezes ningun kontakto ni konosensya los unos de los otros , lo ke desperto en el "el menester de luchar kontra esto".  
Ansi, kon su ermoza koleksyon, Mordehay Arbell  mos  introduzyo en un mundo deskonosido para syertos de entre mozotros i  ancheo muestro espasyo de persepsyon ansi ke muestra vizyon del mundo Sefardi.
Sovre uno de los sellos ekspozados, vimos Moshe Ben Maimon,  autoridad rabbinika, filozofo, eskritor i mediko ke nasyo en el anyo 1135 en Kordova. El fue una de las primeras i mas ilustres figuras del Judaizmo en la Diaspora, visto ke (komo mo lo disho el konferansyer ) la konkuesta de Kordova por los Almohades avia kavzado la fuyida de su famiya ke se refujyo en Fez....
Sovre un otro timbre: El rey Alfonso X el Savyo ke fondo en el 13en siglo la Eskola de Traduktores en la kuala kolavoraron mano kon mano savyos  Muzulmanos, Katolikos i Judios...
Mas leshos, sovre una estampa postal,  la Eglisya de Santa Maria la Blanka, la kuala era orijinalmente la Sinagoga Ibn Shushan fraguada en 1411...
Sovre otra, las "Tavlas astronomikas" del afamado astronomo Avraam Ben Samuel Zacuto  enventador de un "astrolabio" instrumento echo de kovre ke avia muncho ayudado los marineros de la epoka a saver egzaktamente kuala era sus pozisyon jeografika.
En un tyempo relativamente mas serkano de muestra epoka, dos efijias: la del selebre pensador Fransez Michel de Montaigne el kual era de madre Sefardi... i tambyen la de Baruh Spinoza ke nasyo en 1632  de paryentes refujyados de la Inkizisyon; grande filozofo del 17en siglo el kual avia deklarado ke algunos de los konseptos akseptados por el Judaizmo le paresian ser kontroversyales, lo ke provoko una fuerte  opozisyon al seno de la Komunidad Judia de Amsterdam ke lo akuzo de "herezia" (sapkınlık) i lo ekskomunyo.
Ainda mas serka en el tyempo i el espasyo, la efijia de  Elias Canetti nasido en 1905 en Bulgaria, ilustre eskritor,  Premyo Nobel de literatura. Tambyen un timbre reprezentando  Mendes France nasido en la sivdad de Bordeaux en 1907, grande Ombre de Estado Fransez ke pudo meter fin a la gerra de İndokina i aparejo ansi la independensya de la Aljeria.
Se topava en mizmo tyempo en esta ekspozisyon munchos otros timbres reproduzyendo  pinturas byen konosidas de Modigliani i tambyen retratos (portres) de  Sefardis  ilustres en varios kampos de aktividades intelektuales , artistikas o politika.
En desparte de esto, a travers una kuantidad konsideravle de "sellos" Mordehay Arbell tuvo tambyen el merito de meter en valor la kontribusyon de los sefardis en la vida de munchos chikos estados de la Amerika Latina. Ansi, Myerkoles la noche fue un reel periplo en el espasyo istoriko i jeografiko del sefaradizmo.
Es una realidad ke mizmo  si desde   1940  asta 1980/85 el sefaradizmo se topo en un estado de verdadera letarjia por no dizir de kaji  indiferensya enverso su propya lingua etnika, por kontra munchos de sus myembros partisiparon aktivamente  a la evolusyon del progreso i de la sivilizasyon.
Aktualmente se ve  surjir  un fuerte dezeo de komunikasyon, la voluntad de saver , el menester envezes imperyozo de estableser muevos kontaktos... Komunidades sefardis "virtuales" para utilizar la ermoza denominasyon de Rachel Bortnick fueron kreadas....i esto es kaji un milagro... Malgrado  las distansyas jeografikas ke las desparten las unas de las otras, personas ke no se konosian  fizikamente i ke puede ser no van a tener  nunka la okazyon de versen,  avlan entre eyas de igual a igual en un mizmo dezeo de mantener el kontakto.
La ekspozisyon de Mordehay Arbell ke mos yeva leshos en el tyempo i en el espasyo  sera por seguro komentada de una manera muy pozitiva i avrira puertas sovre muevos espasyos de komunikasyon.