La Sinyora Roz Kohen Drohobyczer ...

La Sinyora Roz Kohen Drohobyczer kolavoradora de Dr. Gad Nasi, mos mando una letra relatando la prezentasyon (en Madrid) del livro "En Tyerras Ajenas yo me vo Murir" ke vos transmetemos debasho de estas linyas, traduzida en judeo Espanyol

Judeo-Espanyol
9 Ocak 2008 Çarşamba
Juevez el 11 del mez de Mayo 2006, uvo una grande resepsyon en la rezidensya del Embashador de Turkia para prezentar la segunda edisyon del livro de Dr.Gad Nassi "En tyerras Ajenas yo me vo murir":
En desparte del Embashador Turko su Ekselensya Volkan Vural , eran tambyen prezentes: el Primer Sekretaryo de la Embashada el Sinyor Erkan Aytun, el  Parlamentaryo Sinyor Afif Demirkan, el Sekretaryo de Embashada Volkan Isikci, el Myembro de Embashada Ayhan Enginar, el ansyano Embashador en los Estados Unidos su Ekselensya Sükrü Elekdağ, el Atashe Kultural Grego, los Embashadores de  Almanya,  Slovakia i  Irlanda, el Embashador Israelyano en Madrid ansi kel Direktor del Instituto CERVANTES en Estambol Dr. Pablo Martin Asuero.
Fue djustamente el Dr. Pablo Martin Asuero ke se avia kargado en el anyo 2002 de la prezentasyon de la primera edisyon del livro en Estambol , en kolavorasyon se entyende byen kon la Komunidad Djudia de esta sivdad. Ansi, el atesto su interes por la lingua de los ke depues de aver deshado la Peninsula İberika fueron resividos sovre las Tyerras Otomanas,  erensya komun de la Espanya i de la Turkia. 
Esta vez, es por el Embashados Turko en  Madrid ke la segunda edisyon (echa en Barselona) de este livro eskrito en la lingua i la grafia de los ke desde 5 siglos biven sovre las tyerras otomanas debasho la proteksyon de la Republika Turka, fue prezentada a los ke en Espanya son konsernados por este sujeto. En la asistensya se topavan  el Sinyor Javier Castano del Instituto de Filolojia Sefardi i Ebraika i el Sinyor Pedro Martinez Seiquer, Direktor de la Asosyasyon "Dialogo Mediterraneo".