Mezmo en estas kondisyones, los djudios fueron reushidos i esto es el merito de la madre djudia.
En munchas anekdotas puedemos topar las karakteristikas de la madre djudia. Un orgolyo eksesivo en la reushita de sus ijos es su mas tipika karakteristika. ‘Mi ijo el avokato’, ‘mi ijo el doktor’, ‘mi ijo el enjeniero’ es un egzamplo humoristiko de sus avlas. El kantador Allan Sherman dyo el nombre ‘Mi Ijo El Kantador’ a uno de sus albumes para tomar a su madre al pelo.
La madre djudia forsa sus ijos a reushir en la eskola i en la vida i a kazarsen si no son ainda kazados. Sus ijos para eya son dainda chikos, mezmo si tienen sikuenta anyos. Ay una dicha ke dize ‘El ombre djudio ke tiene su madre en vida, es un mansevo de kinze anyos’.
La madre djudia se ansyea por sus ijos, se espanta de permeter ke agan syempre lo ke keren, porke eya egzajera los perikolos de la vida afuera de kaza. Esto es la influensia de la kultura djudia ke se formo en la diaspora.
Eya apresia el ovedesimyento de sus ijos i ensiste en sus immaturidad . ‘Alevantate Moshe, kale ke te vaygas a la eskola’ le esta dizyendo su madre. ‘No kero’ respondio Moshe. ‘No, kale ke te vaygas’. ‘Dame una razon’ disho Moshe. ‘Tienes sikuenta i dos anyos i sos el direktor de la eskola’.
Este sindrome de la madre fuerte es el resultado de la filozofiya djudia tradisyonal: el ombre dirijando el mundo eskterior i la mujer okupandose de su famiya i del echo de kaza.
Ma oy no es komo antes. Las kondisyones trokaron muncho. La mujer djudia esta lavorando para ayudar a su marido a mantener la fimiya. Eya no tiene mas tiempo para mesklarse a todos los echos de sus ijos i esto es mijor por la formasyon psikolojika de las kreaturas.
Mezmo siendo tan okupada, la madre djudia no neglija sus ijos, topa tiempo a enteresarse de sus problemas, se okupa de eyos, i forma una relasyon kayente kon sus ijos. Yo penso ke estos son los aspektos positivos de la kultura djudia ke da emportansa a la famiya i mas ke todo apresya su kontinuasyon .
