Bilanso Pozitivo

Las provas i los indisyos son multiples: Los varios kongresos  organizados en diversos payizes del mundo oksidental, en Junyo la Selebre Konferensya  de Londra organizada por  Dr. Hilary Pomeroy, en Septembre en Almanya, komo ya lo eskrivimos la semana pasada, el primer  simpozyo sovre la suerte de los Judyos de Orijen Turka entre las dos gerras mundyales... A la semana ke vyene, del 24 asta el 26 del mez koryente, en el Sentro Cervantes de Estambol, la ekspozisyon de timbros Sefardies por Mordehay Arbell, grande filatelisto, grande intelektual, ansyano Konsul Jeneral de Israel en Turkia i en sigida grande embashador en diversos payizes de la Amerika Latina.
En varias sivdades del mundo, la kreasyon de nombrozos sentros de ensenyansa de la lingua, i tambyen de departamentos sefardis al seno mizmo de varias universidades, entre otros El Sentro MOSHE GAON en la Universidad Ben Gurion i el Sentro NAİME İ SELİM SALTİ en la Universidad Bar Ilan... En kaji kada lugar del mundo, una multitud  de  Gazetas, Revistas, Buletines de informasyon, Postos de Radio i de Televizyon, Sityos elektronikos Sefardies,entre los kualos LADİNO KOMUNİDAD dirijido por Rashel Bortnick ke mete en kontakto nombrozas personas.
En Espanya la reedisyon del livro "En Tyerras ajenas yo me vo murir". A este propozito resivimos un e- mail de su autor Gad Nassi,dizyendomos ke la  resepsyon de prezentasyon del livro en la Embashada Turka de Espanya organizada por el Embashador  su Ekselensya Volkan Vural fue muy reushida. En la asistensya la prezensya de una delegasyon de ansyanos ministros i embashadores Trukos i de nombrozas personalidades venidas espesyalmente de İngletyerra i Amerika... Gad Nasi insiste tambyen sovre la presyoza kontribusyon del Instituto Cervantes de muestra sivdad i personalmente de su direktor el Dr. Pablo Martin Asuero...
En Estambol, desde anyos, el sukseso del Teatro Sefardi i  de los konsertos ke mos azen sentir las maraviyozas romansas de muestros avuelos kon sus profunda sentimentalidad  la kuala ekspresa la perenidad de syertos sentimyentos. İ aktualmente las muevas kompozisyones muzikales echas por kompozitores modernos envezes  non Judyos komo Cihat Aşkın,  sovre poemas de poetas kontemporeanos. Los temas son los mizmos  ma el modo de ekspresarlos differente, i esto es un punto muy importante.... Ainda la semana pasada Karen Gerson Şarhon me izo oir una romansa inedita enrejistrada sovre su kompyutador, palavras eskritas por eya mizma, muzika de Alper Almelek, ke literalmente me enkanto de plazer.
Una mueva ovra es syempre una prova de vitalidad, una mueva ovra es la afirmasyon de una maraviyoza promesa  de vida....
Tambyen en Estambol, la realizasyon de nombrozos CD, kaji todos kantando i kontando la vida  Djudia.
Ansi lo vyejo i lo muevo se topan mesklados, inseparavles el uno del otro ... larga kontinuasyon ke enrezya ainda mas la kontinuasyon del Judaizmo en su kualidad de entidad prioritaryamente umana.
La semana pasada, resivimos la vijita del Prof. Georges Rousseau, sitizano Amerikano desendyente de una famiya orijinarya de Turkia, primo de muestros amigos Hayati i Mordo Zakuto, aktualmente ensenyante en el Departamento de İstorya de la Universidad OXFORD  de Ingletyerra. El se topava en Estambol komo partisipante a una Konferensya Internasyonal sovre temas istorikos. La lingua ke utilizimos para komunikar fue espontaneamente el Judeo-Espanyol. El mos konto ke antes su konferensya, kuando lo prezentaron a la asistensya i ke  los idiomas ke el avla fueron enumerados,  entre eyos fue mensyonado tambyen el Ladino.
Ke immensa  alegria es de ver una reflo de vida en muestra vyeja lingua deklarada desde mas de un siglo komo kondenada a murir... Es ke esto va kontinuar? no se... ma kontinuaremos mozotros a luchar, kon o sin esperansa.