Dora NİYEGO
El diya de Shoah (Yom Haa Shoah) vijiti el muevo Yad Vashem en Yerushalaim. Ya saviya kon kualo me iva enkontrar ma no me imajinava ke me iva impresionar tanto.
Este museo ke kontyene el mas grande deposito de enformasyones konsernando el Holokosto, es para los mansevos el mas grande lider en la edukasyon del Shoah, en desparte de los milyones de dokumentos i de los testimonyos de los survivores del Holokosto ke estan kontando kada punto sus estoryas enrejistradas en video-types. Los realizadores del Museo pensaron muy bueno, porke, al lugar de transferar verdades sekas ke todos pueden topar en los livros, eyos mos prezentan estoryas personales, laskualas son mas impresyonantes para los mansevos.
La Pared Memorial en Yad Vashem ke es efektuada por Naftali Bezem, es una de las mas impresyonantes vistas del museo. Esta pared kontiene munchos sembolos. En el sentro, Naftali Bezem metyo el krematorium ke parese a una fabrika kon su chimenea de ande esta salyendo umos. En la siedra del krematorium, se ve una kola larga de personas indosen a sus destino final. Debasho del krematorium: la figura de una mujer tenyendo kandelas en las manos. Esta mujer es el sembolo de la mujer djudia kon las kandelas de Shabat. Ma, aki las kandelas estan al aroves i las flamas estan kemando los pechos de la madre, sembolo de la "fuente de la vida". A la derecha, un peshkado kon la kavesa arrankada del puerpo, salyendo del krematorium. Este peshkado sin kavesa es el sembolo del ‘silensyo’ de las personas embiyadas a la muerte. Enriva del peshkado, "alas de un anjelo" yevando el peshkado al paradiso.
La sigunda seksyon semboliza la ‘rebuelta’. La Sinagoga i las kazas de los djudyos en flamas, pedasos de puerpos bolando en el aver. En un lugar un mansevo tenyendo de en una mano un fuzil, i de la otra detenyendose a una eskalera. Este mansevo es el sembolo del "gerreador djudio" i la eskalera sinyifika “suvir a las tierras de Israel" i en mezmo tiempo reprezenta la "Eskalera de Yaakov" en la Torah.
La tresera seksyon reprezenta ‘la Aliya’, la salida del Holokosto. Un ombre firido ke esta suvyendo a una barka.
En la kuatrena seksyon, el mezmo ombre esta ayegando a Israel. En esta seksyon, el firido se transformo a un leon. Ma, este leon esta yorando porke mezmo syendo muncho mas forsudo agora, el no se esta puedyendo olvidar sus amarguras. Las kandelas en las manos de la mujer no estan mas al arroves ma derechas. La "fuente de vida" ya empeso a koryer de muevo. En la kavesa del leon, ojas estan kresyendo de una planta. Esta planta es el fruto ke se yama "sabra" el kual es el sembolo de la mueva jenerasyon del puevlo de Israel.
Naftali Bezem, el grande artisto ke kreo esta ovra, penso ke es su dover de konmemorar el Holokosto, porke el fue un miembro de la jenerasyon ke testimonio el Holokosto.
El mas grande buto de Yad Vashem siendo de transferar a las futures jenerasyones la trajediya ke se paso akeyos diyas, los realizadores de este museo utilizaron la mas moderna teknolojia konveniente para los mansevos, i la teknika la mas impresyonante, afin ke esta ‘verguensa del mundo’ no seya nunka olvidada.
