Juevez pasado la tadre el 4 del mez de Mayo los tradisyonales premyos de "Vertud", "Byenfezensya", "Esforso Intelektual" ansi ke "Esforso Muzikal", a los kualos oganyo fue tambyen adjustado un muevo "Premyo de Medikeria", fueron atribuidos a personas muy meresyentes, las kualas desde largos anyos kon una perseveransya egzemplar ,sin nunka manifestar la mas chika kanserya ni bushkar kualkyer interes personal, kumplieron un lavoro remarkavle, asumido kon asiduidad i fervor.
Esti SAUL
La alegria de la primavera en Estambol se bive kon el espertimiento luzyo de la natura. El sol kon ardor se karga de ofrirmos las primeras flores. Las de mimoza, amariyas i parfumadas; poko a poko se puede ver las de avramila, ets. Es un djumbush de kolor i de formas realmente remarkavles. Entre las yervas vedres freskas aparese una chika flor de kolor blu. Eya se eskonde grasiozamente, delikadamente en la verdura debasho de la arvoleria de pinos. Se trata de "No te olvides" (Myosotis), la flor FAVORITA de mi MADRE. La oygo dayında komentar: "La myosotis si no se aze remarkar komo la rosa, la trandafila o la klavina; yo la prefero a todas." Mos presenta su linya elegante, timida i sovre todo su kolor rala! Un kameo.
Kaliya ver a mi devuada madre, aresivirme kuando retornava de la eskola kon el buketo de myosotis ke le ofria. Se emosionava i yo mas ke eya!! Es un "chef-d'oeuvre" ke Dıo kreo! Ke maraviyoza forma i kolor! Afishuava el buketo, las aranjava afektuozamente, las arufyava kon kompetensia, i me bendizia: "Madre alegre, tus ijos ke te lo pagen."
Es mi plazer, i yo a mi torno, por LA FIESTA DE LAS MADRES de ofreservos un buketo de flor i suetarvos anyos klaros i alegres komo la primavera.
Se puede olvidar de las madres?
