Şeli GAON
Keridos Lektores,
Savesh ke me eskarinyi muncho de vozotros !...
Ay un syerto tyempo, ke estamos leshos unos de los otros, kavza de okupasyones i responsabilitas no puide eskrivir unos kuantos mezes. Esto no kijo dizir ke me olvidi de vozotros.
Antes quinze dias era la fyesta de Pesah i por esta razon kero augurarvos una anyada kon sanedad, eços buenos, reuşitades en todo modo de espasyos i prosperitad.
Pesah es el sembol de la primavera. Kuando mos vamos al kal; en la orasyon, se yama a la primavera ke es el tyempo onde los arvoles se enfloresen de multi kolores, verduras, los paşaros kantan, i la natura es tanto ermoza; ke mo se avre las alas del korason.
İ en una noche maravigliosa de la primavera, el 27.4. cueves la noche, mos fuimos kon mi marido i amigos a un konserto en Cemal Reşit Rey.
Antes dos anyos mi amigo presyozo Robert Schild fue el editor de un livro intitulado "Los Kaminos Se İncheron de Arena". İ en este livro aviya munchas poesias sefarades modernas.
Cihat Aşkın es un violonisto virtuoz muy emportante ke dyo munchos konsertos en el espasyo international. A parte el es el fondador del " İstanbul Oda Orkestrası" i el dirijente de la Orkestra Filarmonia de Estambol.
Este violonisto selebro i muy modesto partisipo a munchos konseres kon muzisyenes muy famosos i konosidos en diferentes paises d’el mundo entero.
Este konserto se formo de onze kantikas; ke se eskojyeron d’el livro d’el editor Robert Schild; i se formo de onze poesias ke se kompozaron.
La primera ovra se presento por Cihat Aşkın, el violonisto de munça valor, me dyo la empresyon ke la soledad no es una koza deseavle mismo ke es la hazinura de este sieklo ke sufren todos los ke biven solos.
El violon tanto bien utilizado i tanyido ke me yevo a otros mundos, fina azer me yorar.
Hadass Pal-Yarden es una kantadera soprano del judeo-espagnol. Eya muy sempatika i luzya; kon su boz muy alta, kanto unas kuantas kantikas.
En la primera veramente estava difisil de entender los byervos i el senso de la kantika. Ma las otras, muy klaras a entender, i la boz veramente spesyal.
A mi aviso, en un konserto; kale entender i arrevatar unos kuantos byervos para tomar plazer de lo ke estamos oyendo, sintyendo.
Yeşua Aroyo es un kantador bariton ke asistyo a munchos konseres de kantikas sefarades. En 1973 se izo el chef del koro i tomo munchas alavasyones i premyos (ödül) en las kompetisyones.
Vos puedo dizir; ke me tresali de oyir la boz de Yeşua Aroyo; ke estava veramente muy reuşida. Puide sintir en su ovra, los sentimyentos sublimos (ulvi), la ermandad, i munchas otras kozas.
Kero felisitar en primero; a Robert Schild ke se okupo por esta organizasyon, muy valorosa; i mis felisitasyones a Cihat Aşkın ke de korason lo keriya sintir un poko mas, estava muy kurto, a Hadass Pal-Yarden i a Yeşua Aroyo.
Ke seygan syempre muy reuşidos i engrasyados, i mozotros les daremos el apoyo (destek) menesterozo komo la komunitad djudia de Estambol.
İ a la fin; Beki L. Bahar la eskrivana konosida en muestra komunitad; fue envitada a la schena. Cihat Aşkın kompozo dos de sus poesias i la remersiyo en dandole un buketo de rozas. Era koza de ver; la orkestra, el violonisto, i las enterpretasyones de los kantadores kon el chef d’orkestra i Robert Schild.
Munchas felisitasyones i applodisamyentos de la parte de los espektatores entusyasmados de la noçada muy reuşida.
