Cihat Aşkin un Virtuoz i una nochada maraviyoza

Cihat Aşkın iva prometido a Robert Schild ke va kompozar melodias a las palavras de los poemas del livro "Kumların Örttüğü Yollar" i ke aparesyo antes unos kuantos anyos.  En este livro aviya poemas en Judeo-Espanyol de munchos artistas.  Mierkoles la noche se djugo estos poemas i se enterpretaron kualos por Yeshua Aroyo, kualos por Hadass Pal Yarden. 
Cihat Aşkın es envitado todo el tyempo a los payizes etranjeros. Aşkın es tambien  un membro del ensenyamiento en İsrael.  El es envitado a las kuatro partes del mundo para konsertos i tiene una fama muy espandida. Los CD de Cihat Aşkın no se pueden kontar. Estos de alkavos tyempos gano munchos premios. Uno de estos es en el anyo 2002.   El gano en Roma el premio "Foyer des Artistes".
Hakan Şensoy es el direktor permanante de İstanbul Oda Orkestrası i del grupo de la Filarmonia d’Estanbol.  Şensoy resivyo premios del mundo entero ande el estuvo todo el tyempo envitado.  Al 2006 en el mez de June el se ira a Carnegie Hall para un resital de violon. Vedra ke tuvimos el mazal de estar kon estos dos grandes artistas para oyer los poemas de djente ke konosemos i ke siertos biven, siertos no biven.
Cihat Aşkın  mos djugo ‘La Folia’ de Corelli, ke oyimos kon grande antuziazmo. Esta ovra entro al repertuar del violon dizde el 20 siglo.
Mos prezentaron poemas metidos en muzika de:

• 2 poemas de Beki L. Behar • l poema de Salalom Bicerano k’este en ganeden • l poema de Rita Gabbai Simantov
i despues de la pause oyimos
• l peoma de Matilda Gini de Barnatan •l poema de Lina Kohen Albukrek, mi mama k’est en ganeden • l poema de Beatriz Mazliah • l poema  de Clarisse Nicoidski k’este en ganeden • l poema de Eli Perahya • l poema de Avner Perez • l poema de Vitaly Sadacca
Vedra ke mos gozimos de diferentes kantes kualos dichos por Hadass Pal Yarden, kualos por Yeshua Aroyo, Pal Yarden siendo soprano , Aroyo siendo bariton. Fue un konser kaji klasik, i vimos ke kantes o poemas en Judeo-Espanyol pueden ser metidos en muzika klasik, o medyo-klasik.
 lO violones akompanyavan estas bozes tan luzyas.
Komo dishimos mas ariva los ll (onze) kantes son tomados del livro "Kumların Öttüğü Yollar" donde el editör es Robert Schild.
İ esto mos dio la prova ke el ladino ke se empeso a olvidar esta trayando kon si la kultura, l’amor del humano, de la natura,  i la soledad..
La sorpreza ke mos izo Robert Schild es ke a la fin del konserto, la yamo a Beki Bahar ke ya es doyen de tanto bueno ke eskrive, i mos dio la okazyon de aplodisarla kon muncho antuziazmo.  Ansi es ke mos vengimos de la modestia de Beki Bahar, a lo manko una vez..
De Beki Bahar, i solo de Beki,  el violonisto Cihat Aşkın metyo en muzika dos de sus poemas:
Un Pozo en Toledo  (Toledo’da bir Kuyu).
La kaye del Bezo  (Buse Sokağı).
Felisitamos a Beki Bahar en ogurandole vidas largas i munchas eskritas.
El livreto fue eskrito i realizado por Tolga Gülen.