En el programa, entre otras ovras , onze poemas de diferentes poetas, tomados de la Antolojia de Poezias Sefardies "Los Kaminos s’incheron de Arena" realizada unos kuantos anyos antes grasyas a los esforsos entuzyastos de dos Ostriakos Christyanos: Dr. Armin Eidherr i Gerald Kurtoğlu Nitsche i de un Ashkenaz de muestra komunidad Dr. Robert Schild... onze poemas en lingua Judeo-Espanyol, metidos en muzika por Cihat Aşkın violonisto Musulmano de grande virtuozidad i de una.maraviyoza sensivilidad, ke tuvimos la oportunidad de apresyar a la okazyon de nombrozos konsertos o resitales ke el dyo en muestra sivdad.
Entre los otros partisipantes: los byen konosidos i apresyados Hadas Pal Yarden (soprano) i Yeshua Aroyo (bariton), kon la kontribusyon del "Istanbul Oda Orkestrası" enkavesado por el Şef Hakan Şensoy.
Por un minuto mi imajinasyon (" la folle du logis" komo dizen los Fransezes) me yevo leshos leshos en el tyempo, asta un punto luminozo ke se topava al sentro mizmo del oskurantizmo medyeval el mas profondo, punto mirakulozo ande las tres relijyones no solo bivian en paz ma tambyen kolavoravan la mano en la mano....
Toda la gratitud de mi korason de mujer Judia a Cihat Aşkın ke realizo este ermozo lavoro de kompozisyon muzikal, ansi ke a Robert Schild, el arkitekto ke (unos kuantos anyos antes) sembro el simyente de un tan valutozo akontesimyento.
P.S.En el Programa tambyen
"La Folia" de Corelli.
