‘Testimonyo de Vida" es el nombre de esta demonstrasyon. Doz ekspozisyones de los mas selebros muzeos del Holokosto "el Muzeo Yad Vashem en Yerushalaim" i "el Muzeo Lohamei Ha’Getaot (los gerreros del geto)" en el Norte de Israel,van a ser prezantadas akeya noche.En estas ekspozisyones, la Istorya del dezastre perpetrado en la Evropa entre los anyos 1930, va ser reanimada.
La mas importante seksyon de la noche va ser la egzibisyon "Visas for Life" ke asta agora kamino el mundo entero . En esta egzibisyon, vamos a konoser los diplomates de diferentes payizes ke lucharon para salvar los djudyos de sus payizes. Estas personas vertuozas no se espantaron de echarsen al peligro i riskaron sus ofisyos para salvar los djudyos. El Governo de Israel desido de konmemorar estas personas en el Muzeo Yad Vashem i de nombrarlos "Los Djustos de las Nasyones"(Righteous Among the Nations).
En la tresera seksyon de la noche vamos a oyer la istorya de la sovrebiviente Ruth Fayon ke fue salvada del kampo Aushwits prodijiozamente en el anyo 1945 por los soldados Inglezes.
En la seksyon de al kavo, los sej reprezantantes del Koro Ankor del Muzeo Yad Vashem mos van a kantar kantikas tristes por akodrarmos las malas oras de akeyos diyas.
El objekto de la realizasyon de esta nochada es de rekodrar el Holokosto para ke nunka seya olvidado.
