Klara PERAHYA
Asta kuando vash a komemorar la Shoha ? Esta kestyon devyene de mas a mas frekuente, no solo de la parte de los ajenos ma malorozamente tambyen (aunke mas rarament es vedra) de la parte de syertos Judyos.La repuesta es kurta: –"asta la fin de los tyempos i imperativamente".
La Shoa aze parte del destino Judyo. Desde mas de 60 anyos, eya lo kondisyona i trasa delantre de kada ijo de Israel el kamino a sigir. Eya se inskrivyo no solo en la Istorya Judia ma tambyen en la Istorya Umana i mos mostra asta ande puede ir la abominasyon de la salvajeria del ombre:
El dia de la Shoa es por seguro un dia de reminisensya, dever de memorya enverso los ke fueron salvajamente arrankados a la vida, ma tambyen "dia de refleksyon i de lusididad", "konsensya de un menester imperyozo de solidaridad i de ayudo enverso kada umano en el apreto, ken ke sea, en ke lugar del mundo ke se tope".
El es el ovligo para kada judyo o non judyo de ser vijilente, no solo por si mizmo o por los suyos, ma por todos (amigos o enemigos), de repensar kontinualmente las kozas, de djuzgar kada akto inumano, ande ke seya perpetrado, en la totalidad de su gravidad, sin relativizarlo.
Mos ambezimos muncho de la Shoa, mos ambezimos ke no son solos los ke kometen el krimen ke son kulpavles ma (a un nivel diferente) todos los ke no izyeron nada para arrestarlo, mizmo si eyos paresen tener las manos limpyas i la frente alta.
Mos ambezimos ke ay no solo la responsavilidad del akto echo o de la palavra dicha, ma tambyen del akto ke no izimos kuando kaliya azerlo, o de la palavra ke no fue pronunsyada a su ora. La kayades de las nasyones i del publiko antes la segunda gerra mundyal, kuando kemavan livros i kortavan las barvas de los vyejos djudyos, avyo el kamino a los kampos de konsentrasyon.
Entendimos ke ay de asumir no solo el pezgo de muestras aksyones, ma tambyen de muestro silensyo, de muestra immobilidad ,de muestra indiferensya ...Mos ambezimos sovre todo, ke kual ke sea la koza ke se pasa en kualkyer otro lugar del mundo, temprano o tadre vamos a resentir sus reperkusyones ...
Asta ke grado el respekto de la libertad del otro? Asta ke grado el derecho de intruzyon en su vida ? Asta ke grado ser tolerante asta ke grado ser intransijente?
