Una falsa akuzasyon (Un kuento de Pessah)

KUENTOS I LEJENDAS

Coya DELEVİ

(*)-La relijyon de los Djudios, arba de PESSAH, ordena de azer despareser de sus kazas, todo modo de HAMETS. Es un dover de todo shef de famiya, de vijitar a la luz de una kandela, fina el mas chiko kanton de las kamaretas. Esto lo deve azer, por estar siguro o sigura si par azardo no kedo algun pedasiko de pan o levadura. Lo ke se arrekoje en esta vijita, se mete en un lugariko, para kemarlo a la demanyana. Esto se yama la "Seremoniya de HAMETS-BATTELN."(*)
El Rabbi de la Alt-Schul de Prague, ke morava serka la sinagoga, se konformo rigorozamente a este dover. I, kon la konsensya trankila, se fue a durmir. Ma, no pudo. Estuvo vyendo esfuenyos negros, i le paresyo sintir una boz dizyendole "NO KONTROLATES MUY BYEN TU KAZA!." Se esperto kon espanto. Terrorizado, el Rabbi se alevanto, inspekto, no topo nada de Hamets. Alora, lo esperto i al SHAMAS, i se fueron endjuntos a la Sinagoga. Empesaron a azer un kontrol minusyozo. Enfin, kuando se aserkaron del kanton ande se topavan la kupa de plata i otros atakanos servyendo a la seremoniya de SHABBAT, se paralizaron del espanto: La kupa estava inchida kon sangre!…
El Rabbi agradesyo (şükretmek) el Todo Poderozo, ke otruna vez salvo su puevlo de un perikolo, i disho: "Por siguro un enemigo muestro mos izo esta malisya, para destruirmos." El Rav, kon el ayudo del shamas, izo despareser este HAMETS danjerozo. Alimpyaron todo i incheron el vazo kon vino. Tornaron a sus kazas, dechidados de no avlar por la ora, a dingunos de este insidente. (olay)
Noche entera el Rabbi arrogo kon fervor para ke D. aleshe todo malor amenazando los Djudios de Prague. A la demanyana, diya de TAANIT Behorot, kon la enkomendansa del Rav, no solo los bohores, ma, la komunidad entera ayuno (oruç tutmak). La primera noche de PESSAH, los Djudios de la Alt-Schul de Prague, se arrekojyeron en la Sinagoga para las orasyones. No estavan muy alegres, porke, un buen Djudio, Sallum, se topava en prezo. Eyos estavan konvensidos ke el Taanit ke aviyan echo, era por la liberasyon del relijyozo Sallum. (porke este modo les aviya enkomendado el Rav) Las orasyones tanto asemejando a lamentasyones, ke, estavan dando la impresyon de bivir una nochada de TİSHA-BEAV.
En supeto, las puertas de la Sinagoga se avyeron kon brutalidad. Vyeron entrar personas armadas, enkavesadas por un komisaryo. El Rav izo un djesto para kalmar su komunidad reseloza, i, les disho: "No vos espantesh ijos miyos. El Todo Poderozo ESTA KON MOZOTROS. Si alguno pensa tener razones de akuzarmos, ke venga i lo aga."Sovre estas palavras, uvo en primero un grande silensyo.
Todos vyeron un ombre kon una sonriza diabolika (şeytani), aserkarse de la TEVA, tomar la kupa de plata de su lugar, i darsela al komisaryo. El ofisyal vazyo el kontenido de la kupa, de manera a ke toda la asistensya veyga el likuido.
"Ke kere dezir esto?" grito kon sanya el majistrato. "Esto es vino! Este ombre se burlo de mozotros. Bandido, tu mos enganyates en avlando de sangre."
El kalomniador muerto del sar, kedo enkantado, mirando al vino ke estava koryendo. El mizeravle pensando ke esto era su fin, pudo solamente dezir: "El DYO de ISRAEL reelmente es kapavle de mirakolos…", i, kayo dezmayado. La asistensya sin pueder entender lo ke se pasava. demando una eksplikasyon. Fue de muevo el komisaryo ke tomo la palavra:
"Tenesh muncha razon de enkantarvos, sinyores. Reushimos en este momento, a kitar en medyo, una manovra de un sharlatan sin igual. Este mizeravle vos akuzo de emplear la sangre de un Kristiyano para la fyesta de esta noche. Agora esto realizando ke, malorozamente, munchas vezes vos tuvitesh topado enfrente de talas kalomnias. Muy frekuente. fuitesh indjustamente akuzados." Ordeno a los soldados de arrestar el mizeravle mentirozo. Despues se fue ande el governor para relatar lo ke akontesyo. Los Djudios, akel anyo, selebraron la fyesta de Pessah, kon una grande fervor i egzaltasyon (coşku). Teniyan en sus korasones una rekonosensya imensa por la maraviyoza proteksyon del KRIADOR.
      CONTES ET LEGENDES D’ISRAEL- A.WEIL.

(*)-El lektor deve tomar en konsiderasyon ke este kuento esta pasando en la Polonia. Par konsekuensa pueden tener una terminolojiya diferente de la muestra.