Seder en una Prizyon de los Nazis

Traduzido del Inglez por
Dora Niyego

Los ombres estavan asentados endjuntos, abokados en una kamareta de la prizyon. Entre eyos aviya Polonezos ke fueron akuzados por razones diferentes.
Aviya tambien un Haham vyejo ke fue apanyado ambezando la Torah a las kreaturas en una kamareta eskondida. Todos los prizonyeros judyos teniyan una banda atada en el braso kon la estreya amariya estampada enriva. Aviya mansevos i kreaturas apanyados en fuyendosen del Geto. Unos kuantos fueron apanyados en rovandosen kozas de komer, otros en yevando novelas a los rebeldes. Aviya mezmo unos kuantos ke no saviyan deke fueron aprizonados. Ma la mas grande parte fueron aprizonados por dubyo ke puedrian azer danyo a los lideres Almanes.
En esta kamareta areskura, el tyempo no teniya dinguna valor. Komo no aviya ventana no se puediya apartar kuando era diya i kuando era noche. No aviya diyas de lavoro ni diyas de repozo. En vezes viniya un gardiyan para yevar un prizonyero a la muerte.
El Haham pasava el tyempo meldando el livro de ley i orasyonando por los djudyos. Un diya el les disho "Oy es Pesah. Esta noche es la primera noche del Seder".
Todos los prizonyeros mezmo los Polonezos teniyan grande respekto por el. En las oras las mas duras, el saviya darles pasensya i reushiya a kalmarlos. Ma esta vez todos empesaron a burlarsen de el. ‘Te trayeremos i kuatro kupas de vino si keres! I paketos de matsa por siguro. I si keres, apartaremos unas kuantas matsot por akodrarmos de los diyas duros!.
El Haham no los estava oyendo. "Ermanos, ke dize la Haggada? ESTE ANYO AKI,  AL ANYO EN VINYENDO EN TIERRAS DE ISRAEL. Este anyo semos esklavos, al anyo en vinyendo vamos a ser liberos’.
‘Mozotros, los djudyos, nunka fuimos esklavos. El ombre es esklavo, solo kuando el aksepta  de serlo. Miles de anyos los djudyos sufriimos, ma nunka no akseptimos a ser esklavos i nunka vamos a akseptar’.
Todos los djuyos, mansevos, vyejos, relijyozos, nonrelijyozos se aserkaron i se arekojeron delantre de el. Una vez otra, el Haham reusho a darles koraje i esperansa.
Presto, aparejaron la meza del Seder en un kanton de la kamareta. Se asentaron enriva los sakos yenos de tajo i empesaron a oyerlo kontar la istorya del Shemot (Exodus). "Eramos esklavos de Paro en Ayifto’. Todos empesaron a repetar los biervos de la Haggada. Estos biervos los yevaron a un otro mundo,  un mundo majiko.
Enduna se estuvyeron kayados. Uno de los prizonyeros Polonezos empeso a gritar komo un loko: "Esto se yama imprudensya djudiya. Vos esta paresyendo ke aki es una Sinagoga?" Los djudyos no tuvyeron tyempo de responder ke enduna el Polonezo salyo afuera  i lo yamo al gardiyan. El gardiyan entro en la kamareta akompanyado de sus soldados: "Maldichos judyos! En este estado komo puedesh pensar a kantar? Amanyana vos va yevar a todos a la kuedra". ‘Tu Polonezo vas a echar un ojo! Si empesan de muevo a kantar me vas a yamar de vista’. Antes de salir afuera, se abolto de la parte del Haham i le disho: ‘I tu, Talmud djudyo, amanyana emprimero a ti te vo enkolgar’.
Todos se estuvyeron kayados por un sierto tyempo. Dingunos no teniyan el koraje de kitar un biyervo de la boka. La boz kalma del Haham los esperto de sus eshunyos: ‘Pekado de el ke kon su kerer se aze esklavo del pekador!’.
El prizonyero Polonez se konsintyo ke lo ke avia echo no era derecho: "Kontinua a orasyonar si kerech, ma a lo manko damos a entender los biervos".
Esta vez el Haham empeso a traduzir la Haggada en Polonezo. ‘En kada epoka uvo un enemigo ke kijo destruirmos. Muestra kreensya al Dio mos dio la fuersa de luchar. No solo un Hitler, munchos Hitleres kijeron eliminarmos del mundo. Ma ni uno de entre eyos reusho fin agora’.
‘I mozotros tenemos munchos enemigos!’ disho el Polonezo. Duspues yamo a su amigo i le disho: ‘Ven oye los biervos de este ombre intelijente. Esta dizyendo ke la koza la mas importante es de no pedrer la kreensya i la esperansa’. Se abolto verso el Haham: "Deke no mos envitash a la seremoniya? I mozotros tenemos el mezmo destino ke vozos".
"El Dio kreo  todas las personas en su imaje. Solo el pekador efasa su imaje en los ojos del Dio" disho el Haham. "Aserkavos unos de los otros, avriremos lugar a muestros envitados!" les disho a los djudyos.
Los djudyos i los Polonezos se asentaron endjuntos i empesaron a oyer komo  Paro forso los esklavos a fraguar la sivdad de Pitom i komo el, izo matar  las primeras kreaturas de los djudyos. Los djudyos se estavan undyendo de mas a mas en el lodo kuando el Mashiah del Dio, Moshe Rabeno, se alevanto i los salvo.
‘Ah!’ disheron los Polonezos, "la mezma koza esta afitando i oy!"’. ‘Ekskuzamos" le disheron al Haham, echandosen a sus piyezes, "Tu sos una persona de grande valor. No te pudimos entender".
El Haham empeso a kantar una kantika folklorik media en Ebreo media en Polonezo.
"Alhad tuvimos fiesta. Bevimos muncho vino. Kale saver komo alegrarmps.I kale saver kuando arestarmos. Mi hulayyem, mi shpivayem. Mos alegraremos’.
‘Ba-a-am’ una boz de plomo. Todos aboltaron la kavesa verso la puerta. El gardiyan los estava mirando kon ojos inyervozos: ‘Estash dando parti? Vos va tirar los plomos en las kavesas’.
Esta vez dinguno no se espanto de el.  Alora, el gardiyan, enkantado, se alesho de la kamareta.
Akeya noche todos los prizonyeros selebraron  Pesah kon grande alegriya.