"Pesah" sus simbolos, su sinyifikasyon simbolika

Klara PERAHYA

Desde muestra chikez ya konosemos mas o menos la sinyifikasyon de Pesah .."Salidura de Ayifto" , "Liberasyon de los ke fueron syervos a Paro", "Independensya de un puevlo o mas presizamente de un punyado de ebreos .".
Kada anyo fyestamos el evenemento  ke se produzyo antes milenaryos  grasyas al djenyo i partikularmente a la tenasidad i  koraje de un ombre eksepsyonal,  giador i lejislador inkomparavle.
Kada anyo komemos el pan ke no tuvo el tyempo de levdar, el harose i las yervas amargas untadas en el vinagre ke mos akodran la amargura de muestros leshanos avuelos.
Kada anyo sovre la meza paskual, al lado del Korban Pesah, "el guevo" simbolo (segun syertas personas) de la instabilidad de la vida, segun otras de  de fekondidad, premisyo de esperansa.
Kada anyo oyimos kon la mizma emosyon la "Agadah", reminisensya  del tyempo de la afrisyon  i tambyen akodro de muestra propya chikez, del tyempo de la inosensya, de las iluzyones ainda intaktas, de la kreensa sin dubyo....
Ma Pessah no es solo una reminisensya, no deve ser solo un ritual.  El simbolizmo de Pesah  es muncho mas profondo... El simbolizmo de Pessah es "la libertad despues la servitud", "la libertad dezeada malgrado el espanto de un avenir yeno de  prekaridad i de la insertitud de un destino deskonosido".
Pesah es "la responsavilidad de la libertad asumida kon todo lo ke eya komporta de  difikultades ", "el empesijo del largo enkaminamyento en el dezyerto",  "la konkuesta no solo de la independensya ma tambyen de la  konsensya de una realidad ke va mas aya ke lo ke es palpavle i a la kuala kada uno ainda kree sin ver, i mizmo puedeser sin  enteramente entender".
La salida de Ayifto  no es solo una salvasyon korporal, ma una  esperansa ke alora tenia i ainda agora tyene komo objekto: una vizyon  a konkretizar, un proyekto a egzekutir "el Dekalogo".
Este largo estadijo en el dezyerto, estos 40 anyos de insertitud i  de soledad, en la sed i la ambre,  el sometimyento i la revolta, el dezespero  i la esperansa, izo del "Puevlo Judyo" un punyado de ombres i mujeres forros "individualistos aunke terrivlemente atados los unos a los otros", "rezistyentes malgrado sus vulnerabilidad", "monolitikos i portanto multiformes", "otokritikos asta  burlarsen de si mizmo i en mizmo tyempo orgolyozos, el peskueso duro i infleksivle", "pragmatikos ma los ojos syempre tornados verso el pasado", "realistos i  vizyonaryos a la vez", "universalistos todo en kedando syempre fideles a sus tradisyones.   

P.S.
Alhad demanyana ,despues de aver eskapado de eskrivir mi artikolo, tuve la okazyon de segir en la Televizyon Judia de Fransya una emisyon sovre la fyesta de Pesah i los aparejos de la meza de Seder:
Me ambezi lo sigyente:"La lektura de la Agada deve ser echa en lingua komprensivle por todos,espesyalmente por los ninyos; el mesaje deve  ser  transmetido no solo de una manera didaktika, ma grasyas a komentaryos, eksplikasyones, preguntas i repuestas... En syertos lugares se uza mizmo aparejar chikas dulsuryas i frutas sekas para los ninyos afin  de deternelos espyertos i azerlos partisipar a la nochada.
Tambyen segun el Rabbi ke era el prinsipal lokutor del programa.  Solo los vente por syen (20%) de la populasyon Judia ke se topava en akel tyempo en Ayifto, avian tenido el koraje de segir Moshe Rabenu".