Klara PERAHYAAgora, mi korason esta en el ospital Hadassah Ein Kerem, kon el Ombre ke empeso esto todo, el Primer Ministro Ariel Sharon, el Ombre ke tuvo el koraje i la voluntad de ver las kozas de una manera diferente i de traer ansi un trokamyento. Sharon troko su enkaminamyento, ofresyo una alternativa mueva, fundyo "Kadima". Sharon devia estar aki esta noche para ver su suenyo devinir Verdad....
adaptado al Judeo Espanyol por
Dora Niyego
(İstorya otentika)
Vıernes la noche, en salyendo de la Sinagoga, Dan se aserko de un mansevo bruno kon un sako en el ombro. "Deve de ser un Sefardi o puede ser un Marokano"enso Dan. "Shabat Shalom, yo me yamo Dan Eisenblott. Keres vinir esta noche a mi kaza i komer kon mozos?"
La kara del mansevo se izo blanka: "Kon grande plazer. Yo me yamo Machi".
Endjuntos se fueron a la kaza de Dan. En komyendo el envitado tomo el livro de kantikas de Shabat i disho:"esto bushkando una kantika ke kantimos en la Sinagoga esta noche. Komo era el nombre, no me esto akodrando. Parese ke era una koza komo "Dodi..."
"Lecha Dodi" le respondyo Dan i empesaron a kantarla. Duspues ke eskaparon "Agora kuala kantika keres?" le demando Dan. "Demuevo la mizma si puede ser".
En komyendo la gayina "No keres kantar otra kantika?" demando Dan. La kara del mansevo se le izo entera kolorada. "Prefero kantar la mezma".
A la fin Dan se enfansyo i le disho "Kantaremos otra koza, les va pareser a los vizinos ke me se fuyo el meyoyo".
No uvo remedyo! La mezma kantika se kanto ocho o mueve vezes. Duspues de komer, "De ande sos?" le demando Dan. "Ramallah" respondyo el mansevo kon una boz basha.
"No puede ser Ramallah! Deve de ser ke no oyi bueno!" penso Dan. "Ah, si, Ramlah, una sivda en Israel. Un primo miyo bive aya. Ephraim Warner. Lo konoses? Bive en Rehov Hertzel".
"No ay djudyos en Ramallah" respondyo el mansevo.
Dan se estuvo kayado. "Noche de Shabat kon un Arabo! No es posivle"
"Ekskuzame enduna me enkanti. No te demandi tu alkunya?"
"Mahmud Ibn-Esh-Sharif" respondyo el mansevo kon una boz inyervoza.
Unos kuantos puntos, niguno de los dos kito biervo de la boka. Vyendo ke otrun poko Dan se iva ezmayar, el mansevo empeso a kontar:"Yo nasi i me engrandesi en Ramallah. En la eskola mos ambezaron a detestar los djudyos. Muestra tradisyon dize ‘Vaz a kerer por tu ermano la mezma koza ke keres por ti’. Pensi de mi para mi ‘I los djudyos? no son personas? Deke no los keremos bien? Muestra ley dize "No vaz a apartar dingunos". Se lo dishe esto a mi padre. Al lugar de responderme, me echo de kaza. I yo me desidi de fuyirme akeya noche. Apareji el sako, antes de salir mi madre me apanyo:"Ande pensas irte?" . "Me vo azer djudyo i me vo ir a bivir kon los djudyos" le respondi.
"No tienes menester de azerte djudyo" me disho mi madre. ‘Tu ya sos djudyo, tu madre es djudiya. En el djudaizmo la kreatura toma la ley de la madre"..
Akeya noche no iva pueder rezistir otrun shok. ‘Puede ser ke es por esto ke siempre tuve una sempatiya por los djudyos" me pensi de mi para mi.
"Ize un grande yerro de kazarme kon tu padre. Si te vas a bivir kon los djudyos, este yerro ke ize, puede ser se enderecha’ me disho mi madre.
Presto se fue aryento i me trusho unos papeles para provarme ke es reelmente djudiya. Entre los papeles aviya una fotografiya de un viejo. Mi madre me disho ke es uno de mis ansestros. Me disho de guadrar bueno esta foto"
El mansevo se estuvo kayado unos kuantos puntos. Duspues de un sierto tiempo alevanto la kavesa kon lagrimas en los ojos: "Agora esto bushkando ande apartengo yo"
"Puedo ver esta foto?" demando Dan.
Detras del karton, estava eskrito el nombre del viejo, "Shlomo Alkabetz"
Dan no teniya mas dingun dubyo. Esta era la foto de Rabbi Shlomo Alkabetz, un grande Haham.
"Mahmud" le disho Dan. "Tu ansestro era un ombre de grande valor. El eskrivyo esta kantika ke se kanta kada Shabat en la Sinagoga, Lecha Dodi".
Esta vez era el torno de Mahmud de kedarse kayado de emosyon.
Dan espandyo la mano i le disho: "Venido bueno, Mahmud".
