El primer diskorso de Ehud Olmert despues las Eleksyones

Es de esta manera  ke  Ehud Olmert konkluo su primera avla a la sigida del rezultado de las eleksyones, un ultimo omenaje al ombre  ekstraordinaryo, polivalente i multiple ke supo avrir un kamino muevo verso la paz.
Al empesijo, Olmert avlo ansi:
"En poko tyempo, vamos a fiksar las fronteras definitivas del Estado de Israel, un estado Judyo, kon una mayoridad Judia. Mos vamos esforsar de realizar esto en akordo kon los Palestinyanos."
 I adresandose al Leader Palestinyano Mahmoud Abbas,  el adjusto:
"Estamos prontos a  lavorar afin de ayegar a un kompromiso, a dar  partes de muestra tyerra de Israel,  azer salir kon dolor los judyos ke biven en estos lugares, afin de darvos la posivilidad de kumplir vuestra esperansa de bivir en un estado en paz i en la trankilidad. El tyempo ya vino para los Palestinyanos  de realizar una parte de sus aspirasyones,i tambyen de rekonoser el Estado de Israel i de meter fin a la terror....  Ya es tyempo para los Palestinyanos de trokar sus manera de ver, de achetar kompromisos, lo mas presto posivle. Si parvyenen a azer esto en serka, mos vamos asentar kon eyos i lavorar afin de abutir a un plano komun. Si no, Israel se va kargar de su propyo destino... El tyempo ya vino de  pasar al akto.
Ay de esto serka 4 anyos,  el 8/7/2002, a la okazyon de una vijita en Turkiya, durante un dezayuno organizado en su onor en el Gran Rabbinato de Estambol, el mezmo Ehud Olmert mos avia avlado de las difikultades de la vida en Yerushalayim ke  era  a esta epoka una de las shenas ande se produzia lo mas  aktos de terrorizmo.
El mos avia dicho tambyen ke en Israel, el fronte de kombate no se topava en la frontyera ma en kada kanton de kaleja, en kada estasyon de otobus, en los supermarketes, las diskotekas, los restorantes i mizmo las eskolas.
El avia adjustado tambyen ke en Israel no era solo "el ke yevava la uniforma" ke era soldado, ma kada sitizano, kada mujer, kada ombre, kada vyejo, kada ninyo.
Me akodro ke el avia konkluido de la manera sigyente:
"Mozotros no keremos la fin del puevlo Palestinyano, keremos ke biva, ke se desvelope, ke progrese, i keremos tambyen ke mos deshe bivir en la paz i la solidaridad mutual. Si los Palestinyanos keren verdaderamente ayegar a un akordo rasyonal, mozotros semos prontos a ayudarlos, ma si sus eskopo es de destruir Israel, mozotros semos alora prontos a kombatir asta muestro de alkavo reflo".
A kuatro anyos de interval, topamos kaji las mezmas palavras en los dos diskorsos...la mizma voluntad de paz ...la mizma yamada de "lavoro en komun" a los Palestinyanos.