Mustafa KULUODTÜ Öğretim Görevlisi"Troyalılar Yahudi miydi?"iddiası birçoğumuzun hiç duymadığı bir konu olmasına rağmen, yabancı ülkelerde gerek basılı gerekse sanal ortamlarda uzun zamandır tartışılan konulardan biridir. Troyalıların tarihsel olarak önemli olmaları ve birçok devlet adamının kendilerini Troyalılara bağlamalar&#
Klara PERAHYA
Vyernes la noche, en el posto 8 de muestra televizyon Turka, a una ora bastante tardiva, el filmo "SUNSHİNE" fue projektado. Epopea de una famiya Judia Ungareza verso la fin del 19en siglo, kuadro opulente, manera de bivir, avlas i djestos rafinados, epoka por seguro idealizada en muestro esprito, ande se sentia imperseptivlemente los premisyos de un trokamyento fundamental, intensifikasyon de la industria ma tambyen dekadensya de una syerta klasa sosyal.
En la atmosfera, las primeras manifestasyones konkretas de las ideas revolusyonaryas, el despertamyento de la konsensya sosyal... para los unos konsensya de sus deveres, para los otros de sus derechos.
En el empesijo del filmo en kestyon, la egzistensya ainda del grande imperyo "Ostro- Ungarezo".. ainda el fasto de la "Belle epoque" en su rafinamyento.
Para kada uno de los protagonistos: el drama de la doble apartenensya a dos ordenes diferentes, envezes antagonistos...Una famiya de la burgezia Judia,"madre i padre" syempre atados a los preseptos de los avuelos, "el ijo grande" briyante myembro de la majistratura Ungareza , destinado a los mas altos postos en su karrera; "el segundo" mediko dedikado a la lucha kontra la sufriensa; "un treser ermano " ainda adolesente; i enfin "una mansevika" una sovrina de la parte maternal, adoptada kon kerensya i konsiderada komo myembro reel de la famiya...entre eya i el ijo grande un amor loko kel padre konsidero desde el prisipyo komo un afronto al respekto de las tradisyones.Primeras fisuras (chatladeaduras) en la koezyon familyal.
Entre los ermanos tambyen, primeras diverjensyas. De una parte, para el majistrato: la fidelidad inkondisyonal al rejimen governomental del İmperyo ...de la otra, para el mediko: la avyertura a las ideas sosyales muevas, a la sigida de los primeros kontaktos reel kon la mizerya del puevlo.
Para los djudyos, primeros litijyos entre las jenerasyones, primeros konflitos entre de una parte "el modernizmo i la realidad de la epoka" i de la otra "los preseptos imperyozos de la relijyon i partikularmente los imperativos de la tradisyon" ... una referensya kontinual a los ansestros de la parte del padre, ideas i prinsipyos de aktualidad de la parte de los ijos asta akseptar de trokar sus alkunya por razon profesyonal, i malorozamente a la segunda etapa , akseptar de trokar de relijyon, lo ke no los salvo de la desgrasya..
En la tekstura del espektakolo, del empesijo asta la fin dos temas de una persistensya obsesyonal:
El primer, el tema muzikal, syempre el mizmo, repetido kontinualmente i ke a el solo supo krear una atmosfera de reminisensya mesklada a un sentimyento ainda indistinkto de tristeza...
El segundo tema, tambyen sin diskontinuar, el vyejo prejuisyo del antisemitizmo ke kualo ke agamos mos va sin dubyo persigir asta la fin de los tyempos.
Asta ke grado yevamos muestro destino en mozotros o byen asta ke grado semos las personas echas por este destino?
El filmo se eskapo de una manera orozamente optimista, el retorna a la fin de la jenerasyon aktual a sus raizes ansestral, a la relijyon de lakuala ningun judyo (ke sea praktikante o no praktikante) no se puede nunka despartir enteramente.
Asta ke grado el pragnatizmo , asta ke grado la fidelidad?
Asta ke grado la avyertura verso el avenir, asta ke grado el atamyento al pasado?
