Ma, reelmente, en estos diyas de invyerno, i tomando en konsiderasyon las oras del kurso, (19.00ᆪ.00) era difisil, kaji imposivle para mi. Dechidi de asperar kon pasensya los diyas de Primavera! para pueder realizar este dezeo miyo.
Bueno! Me ambezi ke diya de Shabbat, 11/02, los elevos ke eskaparon el primer kurso, se ivan arrekojer en el "ŞALOM,"entre las oras 15.00ᆥ.00. Me informi ke ya podiya i yo tambyen partisipar a esta reunyon. Iva ser mas muncho, para los elevos, una okazyon de konversar en LADINO, i no un kurso.
Dunke, esta reunyon de Shabbat, fue para mi una grande oportunidad. Antes de todo, el lugar konosido, serka de ande moro, i las oras muy konvenyentes. Komo lo uzo kaji syempre, fui la primera a arrivar (antes ke no kede!!) Era sigunda vez ke me iva topar kon elevos de un kurso de Ladino, en el mezmo salon. La primera vez fue kon los mansevos Israelyanos de la Universita Ben Gurion de Beer-Sheva.
Enfin, empesaron a venir. No eran nombrozos en el empesijo. Konosi a Hülya, Emel, Ceni, Dalia, Alper, Izel i otros…En desparte de mi, estavan muestras amigas del ŞALOM, Anet i la simpatika Ester Yannier, i, naturalmente la kerida Karen. En una atmosfera alegre, empeso "la seans!" de konversasyon.
Yo, en primero pensi ke iva partisipar en una manera pasiva, i solamente oyir lo ke se estava dizyendo. No fue ansina. De sira, todos meldimos unas, doz frazas del teksto. A la fin de kada paragrafo, se izo komentos. Aki kero felisitar Karen, porke reelmente, tyene una maestria i pasensya ilimitadas. Son doz kualidades muy menesterozas en el ensenyamiento. Vide ke estos mansevos, estan dezeozos de ambezarsen, i ya izyeron syertos progresos en Ladino. La verdad ke sinti una ola de orgolyo i guste, byen ke penso ke dayinda estan en el empesijo, i tyenen un largo kamino…Karen esta kitando buen lavoro. Le sueto reushita.
Mi kontentes pujo kuando Karen mos izo meldar a todos, (a mi tambyen!) las doz poezias de amor ke eskrivi yo para "EL AMANESER," a la okazyon del 14 Febrero. Despues vino a la meza, una ermoza torta, bevyendas i otras dulsuryas. Era el kumpleanyo de Alper, i los amigos le izyeron un djesto kon esta sorpreza. Por un kurto momento la reunyon se transformo en una "surprise-party", syendo ke uvo i muzika…
Karen, antes de empesar a la lisyon, mos aviya defendido kategorikamente de avlar algo ke el Ladino. En jeneral, los mansevos respektaron la defensa. Ma, es muy natural ke dayinda sus vokabularyo no es sufizyente. Portanto, es de apresyar sus buena veluntad i los esforsos ke estan azyendo. Aki, otro un bravo a eyos!…
Ala fin, kompozimos un koro i empesimos a kantar, lo ke es uno de los metodos de Karen, para ambezar el Judeo-Espanyol. Kantimos Ocho Kandelikas, Avram Avinu, Adiyo Kerida ets…Karen eskojyo espesyalmente la kantika HAD GADYA (un kavretiko), para ensenyar el "pasado" de los verbos: me merko, vino, komyo, mordio, aharvo, kemo, i este modo fin a la fin.
Entervalo, vimos a traves las puertas de vidro, arrivar el grupo de la redaksyon del Şalom, para sus reunyon semanal. Kada uno kon kuryozita estava echando un ojo al salon muestro, lo ke no era una vista "abituala" para eyos. Lo mas ermozo fue ke la tomimos a la kerida Tilda, i la izimos kantar kon mozotros "ocho kandelikas!"…
Todo tyene una fin, deshando la esperansa…Ya estava eskuresyendo kuando mos espartimos, aprometyendo de arrekojermos de muevo, lo ke izimos, en el 25 Febrero, i en el 11 Marso.
